मिरा रोड रेल्वे स्थानकापासून जवळच लिंक रोडकरिता गर्डरच्या उभारणीसाठी एल अँड टी कंपनीकडून कास्टिंग यार्ड उभारण्यात आले आहे. येथे गँट्री क्रेन बसवण्याचे काम शनिवारी दुपारी सुरू असताना क्रेनचा काही भाग सुमारे १२ मीटर उंचीवरून अचानक खाली कोसळला. यावेळी क्रेनच्या वरच्या भागावर काम करत असलेले रघुनाथ भक्तबल्लव दास (३८) व कला महिंदर सिंग (४५) हे कामगारही खाली पडले. गंभीर जखमी झालेल्या दोघांनाही जवळच्या शासकीय जोशी रुग्णालयात नेण्यात आले. मात्र, दाखल करण्यापूर्वीच त्यांचा मृत्यू झाला असल्याचे डॉक्टरांकडून घोषित करण्यात आले.

Mumbai News : ‘गिरीश महाजनांनी किमान माझं ऐकलं’; भाजप आंदोलनात राडा घालणारी महिला अखेर समोर, त्यादिवशी झालेल्या प्रकारावर सविस्तर बोलली
रघुनाथ हे ओडिशामधील जाजपूरचे, तर कला हे पंजाबच्या जालंधर गावचे मूळ रहिवासी आहेत. याप्रकरणी भाईंदर पोलिस ठाण्यात अपघाती मृत्यूची नोंद करण्यात आली आहे. आवश्यक सुरक्षा उपाययोजना न करण्यात आल्याने ही दुर्घटना घडली असल्याचे बोलले जात आहे. त्या अनुषंगाने तपास केला जात असल्याची माहिती भाईंदर पोलिसांकडून देण्यात आली.

दोषींवर कठोर कारवाई…
या घटनेची सखोल चौकशी करण्यात येणार आहे. चौकशीत त्रुटी आढळल्यास संबंधित कंत्राटदारांवर कठोर कारवाई करण्यात येईल, अशी माहिती पालिकेकडून देण्यात आली. कार्यस्थळी कामगारांच्या सुरक्षिततेबाबत प्रमाणित कार्यपद्धती निश्चित करण्यात आली असून तिचे पालन करण्यात आले होते का, याची शहानिशा करण्यात येईल. तसेच, वस्तुस्थिती तपासली जाईल. नियमभंग करणाऱ्यांविरुद्ध कठोर कारवाई करण्यात येणार असल्याचेही महापालिकेने स्पष्ट केले. चौकशीसाठी ‘व्हीजेआयटी’च्या प्राध्यापकांच्या तज्ज्ञ चमूची नियुक्ती करण्यात आली आहे. हा चमू चौकशी करून वस्तुनिष्ठ व तथ्याधारित अहवाल सादर करणार आहे.