पोलिसांच्या माहितीनुसार, एक हायवा (एमएच ०४ जीसी ०९८८) शिवशक्तिनगरकडून खुटवडनगरकडे येत होता. मद्यधुंद हायवाचालकाचे नियंत्रण सुटल्याने ‘सीटू’ भवन चौफुलीवर हायवाने सर्वप्रथम स्विफ्ट डिझायरला (एमएच १५ जीएल ६१८३) जोरदार धडक दिली. कारमधील एका कुटुंबातील चार जण अपघातात बचावले, मात्र कारचे मोठे नुकसान झाले. नंतर खुटवडनगरहून ‘आयटीआय’ सिग्नलकडे जाणाऱ्या पायल राम गोसावी (वय २२, रा. खुटवडनगर) हिच्या दुचाकीला (एमएच १८ सीएच ३८८०) डंपरने धडक दिली.
Woman Died After Delivery: सिझरनंतर काही तासांतच मातेचा मृत्यू; नातेवाईकांचा हलगर्जीपणाचा आरोप, नाशकात महिनाभरात तीन घटना
या अपघातात डंपरच्या चाकाखाली अडकल्याने पायलचा जागीच मृत्यू झाला. तर दुचाकीवर मागे बसलेली मोठी बहीण दामिनी गोसावी थोडक्यात बचावली. याचदरम्यान डंपरचालकाने पुढे आणखी एका दुचाकी आणि चारचाकीलाही धडक दिली. पुढे डंपर औदुंबराच्या झाडावर धडकल्याने मोठा अनर्थ टळला. अपघातानंतर घटनास्थळी संतप्त नागरिकांनी ठिय्या देत रास्ता रोको आंदोलन केले. त्यामुळे काही काळ वाहतुकीची मोठी कोंडी झाली होती.

दृश्यांनी उडाला थरकाप
हा भीषण अपघात पाहून घटनास्थळी उपस्थित नागरिकांचा थरकाप उडाला. क्षणार्धात पायल डंपरच्या चाकाखाली अडकलेली पाहून काहींनी मदतीसाठी धाव घेतली, तर काही जणांनी पोलिसांना माहिती दिली. मात्र परिस्थिती इतकी गंभीर होती की, अनेकांना अश्रू अनावर झाले.
Nashik TCS Case : टीसीएस कंपनी ‘डेलॉईट-ट्रायलीगल’मार्फत नाशिक प्रकरणाची सखोल चौकशी करणार, निदा खानबद्दलही मोठा खुलासा; अधिकृत निवेदनात काय सांगितलं?
संतप्त नागरिकांची घोषणाबाजी
अपघातानंतर संतप्त नागरिकांनी चौफुलीवर रास्ता रोको करत ठिय्या दिला. शिवसेनेचे ललित बाविस्कर यांच्या नेतृत्वाखाली मद्यधुंद चालकावर कडक कारवाई करण्याची जोरदार मागणी करण्यात आली. पायल गोसावीला न्याय मिळावा, यासाठी घोषणाबाजी करण्यात आली.

स्वप्नांच्या उंबरठ्यावरच जीवनाचा अंत
अपघातात मृत्यू झालेली पायल गोसावी ही महात्मानगर येथील एका कंपनीत लेखा विभागात कार्यरत होती. तिने नुकतेच ‘एमबीए’ पूर्ण केले होते. घरात लग्नकार्य असल्याने कार्यालयातून सुट्टी घेतली होती आणि मेंदी काढण्यासाठी दोघीही नातेवाइकांच्या घरी जात होत्या. आई-वडील आणि लहान भाऊ असा तिच्यामागे परिवार आहे. पायलच्या अपघाती मृत्यूमुळे परिसरात हळहळ व्यक्त होत आहे.