मोबीन खान, संगमनेर, अहिल्यानगर : महिलांचे लैंगिक शोषण आणि आर्थिक गैरव्यवहार प्रकरणी भोंदू बाबा अशोक खरात सध्या जेलमध्ये असून भोंदूगिरीचा खरात पॅटर्न राज्यभर चर्चेत आहे. अशातच अहिल्यानगर जिल्ह्यात देखील एका भोंदू बाबाचा अंनिसने पर्दाफाश केला आहे. ‘माझ्याकडे दैवी शक्ती आहे, मी मंत्रशक्तीने कॅन्सर बरा करतो आणि निपुत्रिकांना पुत्रप्राप्ती करून देतो,’ असा दावा करत सर्वसामान्यांची आर्थिक लूट करणारा भोंदू बाबा राजेंद्र बापू गडगे याच्यासह पाच साथीदारांविरुद्ध रंजना गवांदे यांच्या फिर्यादीवरून संगमनेर तालुका पोलीस ठाण्यात शुक्रवारी संध्याकाळी गुन्हा दाखल करण्यात आला आहे.

एआय तंत्रज्ञानाचा गैरवापर

विशेष म्हणजे, या बाबाने आपल्या विरोधात आवाज उठवणाऱ्या अंधश्रद्धा निर्मूलन समितीच्या (अंनिस) राज्य सरचिटणीस ॲड. रंजना गवांदे यांची चक्क ‘एआय’ तंत्रज्ञानाचा वापर करून बनावट व्हिडिओद्वारे बदनामी केल्याचाही खळबळजनक प्रकार समोर आला आहे. संगमनेर पोलिसांनी या भोंदू बाबाला बेड्या ठोकल्याने अजूनही काही तक्रारदार समोर येण्याची शक्यता आहे.

दत्तधाम सरकार चालवणारा भोंदू

याबाबत अधिक माहिती अशी की, संगमनेर तालुक्यातील वडगाव पान येथे ‘दत्तधाम सरकार’ नावाचा आश्रम चालवणारा भोंदू महाराज राजेंद्र बापू गडगे याच्या विरोधात ही कारवाई करण्यात आली आहे. त्याच्यासोबत डॉ. मोहन पुरी, ज्ञानेश्वरी गडगे, सूरज शिंदे आणि मधुकर शिंदे यांच्यावरही विविध कलमान्वये गुन्हे नोंदवण्यात आले आहेत.

अंनिसच्या राज्य सरचिटणीस ॲड. रंजना गवांदे यांनी याप्रकरणी फिर्याद दिली आहे. राजेंद्र गडगे हा स्वतःला दैवी शक्ती प्राप्त असल्याचा भास निर्माण करून लोकांकडून ११ हजार ते ५१ हजार रुपयांपर्यंत रकमा उकळत होता. कॅन्सरसारखे गंभीर आजार मंत्रांनी बरे करण्याचा खोटा दावा तो करत असे. या लुबाडणुकीच्या अनेक तक्रारी ‘अंनिस’कडे प्राप्त झाल्या होत्या. जेव्हा ॲड. गवांदे यांनी या प्रकरणाचा पाठपुरावा सुरू केला, तेव्हा बाबाने सूडबुद्धीने त्यांचे आणि संघटनेचे नाव खराब करण्यासाठी कट रचल्याचा आरोप फिर्यादीमध्ये करण्यात आला आहे.
Pune Crime : पतीशी अनैतिक संबंध असल्याचा संशय, पत्नीने विवाहित सेक्रेटरीचा जीव घेतला, पुण्यात दाम्पत्यासह 13 वर्षांची मुलगीही ताब्यात

‘एआय’ व्हिडिओ बनवून बदनामी

भोंदू बाबाने आधुनिक तंत्रज्ञानाचा गैरवापर करत ॲड. गवांदे यांचे बनावट फोटो आणि व्हिडिओ तयार केले. ‘आम्ही बाबाकडे खंडणी मागत आहोत,’ असा बनावट आशय त्यात पेरला होता. हे व्हिडिओ सोशल मीडियावर व्हायरल करून ‘माझ्या विरुद्ध बोलाल तर खबरदार’ अशी दहशत निर्माण करण्याचा प्रयत्न बाबाने केला. मात्र, हे व्हिडिओ ‘एआय’ निर्मित असल्याचे गवांदे यांनी म्हटले आहे.फिर्यादीनुसार, १२ एप्रिल रोजी काही संशयितांनी ॲड. गवांदे यांना फोन करून धमकावण्याचा प्रयत्न केला. तसेच त्यांच्या घराबाहेर येऊन दबाव निर्माण केला. या प्रकारामुळे आपल्या जीविताला धोका निर्माण झाल्याचे ॲड. गवांदे यांनी तक्रारीत म्हटले आहे.
Nashik Crime : प्रत्येक सेकंदाला कॉल यायचा, TCS नाशिकमधील विवाहितेबाबत जाणीवपूर्वक सेटिंग, ‘सीक्रेट’साठी दबाव

पाच जणांवर गुन्हा

पोलिसांनी या प्रकरणी भारतीय न्याय संहिता (BNS) सह खालील कडक कायद्यान्वये गुन्हे दाखल केले आहेत, महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक कायदा, २०१३,औषधीद्रव्ये आणि जादूटोणा उपाय (आक्षेपार्ह जाहिराती) अधिनियम, १९५४,महाराष्ट्र वैद्यकीय व्यावसायिक अधिनियम, १९६१,माहिती तंत्रज्ञान कायदा (IT Act) – बदनामी आणि बनावटगिरीसाठी अशा विविध कलमान्वये पाच जणांविरुद्ध गुन्हा दाखल करण्यात आला आहे.या प्रकरणाचा अधिक तपास संगमनेर तालुका पोलीस करत असून, भोंदूगिरीच्या या मोठ्या जाळ्याचे धागेदोरे कुठपर्यंत पसरले आहेत, याचा शोध घेतला जात आहे.