अमेरिका आणि इराण युद्धाला 15 दिवस पूर्ण झाली. मोठे हल्ले केले जात आहेत. हेच नाही तर जमिनीवरील हे युद्ध आता थेट समुद्रापर्यंत पोहोचले. इराणकडून होर्मुज मार्ग बंद करण्यात आल्याने अमेरिकेची मोठी नाचक्की झाली. अनेक देशात गॅस आणि तेल संपले असून जागतिक बाजारपेठेत तेलाच्या किंमती वाढल्या आहेत. इस्त्रायल, इराण आणि अमेरिका यांच्यापुरतेच युद्ध मर्यादित राहिले नसून अनेक देश संकटात आहेत. आखाती देशांमध्ये फळे आणि भाज्या शिल्लक नाहीत. अन्नाचा मोठा तुटवडा निर्माण झाला. पाकिस्तानवर भिकेला लागण्याची वेळ आली असून ऐन रमजानच्या महिन्यातच सरकारी कर्मचाऱ्यांची 30 टक्के पगार कापली जात आहे. डोनाल्ड ट्रम्प यांचा इराणसोबतचा युद्धाचा निर्णय चुकल्याचे सांगितले जात आहे. अमेरिकेचे राष्ट्राध्यक्ष डोनाल्ड ट्रम्प यांनी इतर देशांना होर्मुझच्या सामुद्रधुनीच्या संरक्षणासाठी जहाजे पाठवण्याचे आवाहन केले आहे. मात्र, इराणसोबत पंगा होर्मुजच्या खाडीत एकटी अमेरिका घेताना दिसत नाही

होर्मुजच्या खाडीच्या मुद्दात अमेरिकेने अनेक धमक्या इराणला दिल्या. मात्र, इराणकडून कोणत्याही प्रकारची भीक घालण्यात आली नाही. यानंतर थेट नाकीनऊ आल्यानंतर अमेरिकेकडून होर्मुजमध्ये युद्धनाैका पाठवण्याचे आवाहन केले. त्यांनी पूर्वी सांगितले होते की, अमेरिकन नौदल लवकरच होर्मुझच्या सामुद्रधुनीतून टँकरना एस्कॉर्ट करण्यास सुरुवात करेल. मात्र, आता अमेरिका स्वत:च्या नाैदलाला सुरक्षित ठेऊन इतरांना त्यामध्ये अडकवताना दिसत आहे.

होर्मुज खाडी बंद असल्याने अमेरिकेलाही मोठा फटका बसत आहे. इतर देश त्यांच्यावर दबाव टाकत आहेत. एकीकडे अमेरिका दावा करत आहे की, इराणची लष्करी ताकद संपली आहे. मात्र, दुसरीकडे होर्मुज खाडीच्या सुरक्षेसाठी इतर देशांची मदत मागितली जात आहे. इराणकडून अमेरिकेलाही होर्मुजच्या खाडीत धोका वाटत आहे. जपान, फ्रान्स, चीन, ब्रिटन, दक्षिण कोरिया हे देश होर्मुज खाडीत त्यांच्या युद्धनाैका पाठवतील अशी अपेक्षा असल्याचे डोनाल्ड ट्रम्प यांनी म्हटले.

जर देशा देशांनी त्यांच्या युद्धनाैका किंवा जहाजे पाठवली तर होर्मुज खाडी पूर्णपणे सुरक्षित होईल आणि धोका निर्माण होणार नाही, असे डोनाल्ड ट्रम्प यांनी म्हटले. आता खरोखरच डोनाल्ड ट्रम्प यांच्या आवाहनानंतर हे देश त्यांच्या युद्धानाैका होर्मुज खाडीत पाठवणार का? हा प्रश्न उपस्थित होतो. चीन याबाबत नक्की काय भूमिका घेतो, याकडे सर्वांच्या नजरा आहेत.