रात्री त्यांच्या मोबाईलवर सरकारकडून सतर्कतेचे अलर्ट मेसेज येत होते. बाहेर न पडण्याच्या आणि खिडक्यांचे पडदा लावण्याच्या सूचना देण्यात आल्या होत्या. मात्र प्रत्यक्षात शहरात भीतीचे वातावरण जाणवत नव्हते. रस्त्यांवरील वाहतूक नियमित सुरू होती, बाजारपेठा आणि मॉल्स उघडे होते आणि रमजानच्या रोषणाईने शहर उजळले होते. दुसऱ्या दिवशी त्यांनी शहरातील काही ठिकाणांना भेट दिली. बहुतांश पर्यटनस्थळे सुरू होती; केवळ BAPS Hindu Mandir Abu Dhabi बंद असल्याचे त्यांनी नमूद केले.

त्यांच्या पोस्टमध्ये भारतीय वृत्तवाहिन्यांच्या कव्हरेजबाबतही त्यांनी भाष्य केले आहे. “टीव्हीवर बाँबवर्षाव, पण बाहेर शांतता,” असे त्यांनी लिहित माध्यमांच्या अतिनाट्यमय सादरीकरणावर अप्रत्यक्ष टीका केली. वारंवार दाखवले जाणारे क्षेपणास्त्रांचे दृश्य आणि ‘ब्रेकिंग न्यूज’चा गजर पाहून भारतातील नातेवाईकांची चिंता वाढली होती. “टीव्ही बंद केला आणि जणू युद्ध थांबल्यासारखे वाटले,” अशी भावना त्यांनी व्यक्त केली.

दरम्यान, त्यांच्या वृद्ध आईची चिंता अधिकच वाढली होती. व्हिडिओ कॉलवर मुलगा सुरक्षित असल्याचे पाहून तिचा जीव भांड्यात पडला, तरीही तो मायदेशी परत येईपर्यंत काळजी कायम होती. काही दिवसांनी विमानसेवा सुरू झाली आणि त्यांनी हैदराबादमार्गे भारत गाठला.
Sagar Mohalkar : जामखेडमध्ये निलेश घायवळवरच्या कानशिलात लगावणाऱ्या गुंड सागर मोहळकरवर गोळीबार
पोस्टच्या शेवटी त्यांनी श्रीरामोक्तीचा उल्लेख करत “जननी जन्मभूमी स्वर्गापेक्षाही महान” असल्याची भावना व्यक्त केली. “स्वर्णमयी लंका नको, मला माझी मातृभूमी हवी,” असे म्हणत त्यांनी परतीच्या प्रवासातील भावनिक क्षण मांडले. युद्धाच्या छायेतून परतताना मातृभूमीची ओढ अधिक तीव्रतेने जाणवल्याचे त्यांनी नमूद केले.

त्यांची ही भावनिक आणि वास्तववादी पोस्ट सध्या सोशल मीडियावर मोठ्या प्रमाणात शेअर होत असून, अनेकांनी त्यावर प्रतिक्रिया देत सुरक्षित परतीबद्दल समाधान व्यक्त केले आहे. युद्धाच्या पार्श्वभूमीवर परदेशातील अनुभव आणि मायदेशी परतण्याची ओढ यांचा संगम असलेली ही कहाणी अनेकांच्या मनाला भिडत आहे.