अविनाश मोहितेंची घोषणा

तमाम ऊस उत्पादक शेतकरी आणि कष्टकरी कामगारांच्या स्वाभिमान आणि कल्याणासाठी संस्थापक पॅनेल यशवंतराव मोहिते कृष्णा सहकारी साखर कारखान्याच्या निवडणुकीत निवडणुकीत उतरणार असल्याची घोषणा अविनाश मोहिते यांनी प्रमुख कार्यकर्त्यांच्या मेळाव्यात केली. कारखान्याची सध्याची अवस्था पाहताना मन विषण्ण होते. ज्या कारखान्याने सहकारात आदर्श निर्माण केला, त्या कारखान्याचा सामान्य सभासद आणि रात्रंदिवस राबणारा कामगार आज दुर्लक्षित आहे. सभासद आणि कामगारांच्या स्वाभिमानासाठी आम्ही एका नव्या संघर्षाचे रणशिंग फुंकत आहोत, असे त्यांनी जाहीर केले.
Unmesh Patil : आधी भाजप सोडली, आता ठाकरेंना; माजी खासदार उन्मेष पाटलांचा ‘जय महाराष्ट्र’, शिवसेना प्रवेशाचा मुहूर्त ठरला

सत्ताधाऱ्यांवर ताशेरे

अविनाश मोहिते पुढे म्हणाले की, गेल्या १० वर्षांत विद्यमान सत्ताधाऱ्यांनी कारखान्याचे काय करून ठेवले आहे, हे सर्वांच्या समोर आहे. कामगारांच्या पगारवाढीचा प्रश्न असो, पदोन्नती (बढती) असो वा हक्काचा उच्चांकी बोनस; आजच्या प्रशासनाने कामगार आणि अधिकारी वर्गाच्या हिताकडे पूर्णपणे पाठ फिरवली आहे. इरिगेशन स्कीम्स (उपसा जलसिंचन योजना) बंद पडल्या आहेत किंवा अत्यंत वाईट अवस्थेत आहेत. सभासदाचे म्हणणे ऐकून घ्यायला कोणीही जबाबदार व्यक्ती उपलब्ध नसते, ही देखील शोकांतिका आहे. संस्थापक पॅनेलने २०१० साली कृष्णा कारखान्यात ऐतिहासिक सत्तांतर केले होते. त्या पाच वर्षांत आम्ही सभासदांना FRP पेक्षा ३४१ कोटी रुपये सरासरी जास्त दर देऊन इतिहास घडवला होता. कामगार आणि अधिकारी वर्गाला सन्मानाची वागणूक दिली. वेळेवर पगारवाढ आणि विक्रमी बोनस दिला. २०१५ मध्ये देखील तुम्ही आम्हाला भरभरून मतदान केले होते, पण तत्कालीन सत्ताधाऱ्यांनी सरकारी यंत्रणेचा वापर करून, मतमोजणीत फेरफार करून निकाल बदलला असा खळबळजनक आरोप अविनाश मोहिते यांनी केला.
Rajya Sabha Election : राष्ट्रहितासाठी ठाकरेंनी राज्यसभेचा हट्ट सोडावा, काँग्रेसने गणित मांडलं; समीकरण तेच, तरी मविआत पेच

‘कृष्णे’त परिवर्तन घडवू’

आम्ही आता स्वस्थ बसणार नाही. कराड, वाळवा, कडेगाव आणि खानापूर या चारही तालुक्यातील सभासदांच्या अडीअडचणी जाणून घेण्यासाठी आम्ही संपर्क दौरे सुरू करत आहोत. रखडलेली पगारवाढ आणि सन्मान परत मिळवून देऊ. बंद पडलेल्या योजना पुन्हा कार्यान्वित करू आणि उसाला योग्य दर देऊ. कारखान्याचा कारभार पुन्हा एकदा सभासदांच्या हिताचा करू. संस्थापक पॅनेलच्या कार्यकर्त्यांनी जोमाने कामाला लागावे. सभासदांच्या संपर्कात राहून पुढच्या तीन ते चार महिन्यात येणारी पंचवार्षिक निवडणूक संस्थापक पॅनेल पूर्ण ताकदीने लढवेल आणि तुमच्या सर्वांच्या साथीने ‘कृष्णे’त परिवर्तन घडवेल, असा विश्वास अविनाश मोहिते यांनी यावेळी व्यक्त केला.

कृष्णा कारखान्यात २०१० साली अविनाश मोहिते यांच्या नेतृत्वाखाली संस्थापक पॅनेलने ऐतिहासिक सत्तांतर केले होते. मात्र, २०१५ साली पुन्हा डॉ. सुरेश भोसले यांची सत्ता आली. गेली दहा वर्षे भोसले गटाचीच सत्ता आहे. त्यांचे सुपुत्र डॉ. अतुल भोसले हे कराड दक्षिणचे आमदार आहेत. चार तालुक्यांचे कार्यक्षेत्र असल्याने कृष्णा कारखान्याच्या निवडणुकीशी अनेक नेत्यांचा संबंध येतो. मात्र, सर्वाधिक सभासद हे कराड तालुक्यातील आहेत. त्यामुळे यंदाची निवडणूक अटीतटीची होणार आहे.