नाशिक पोलिसांनी थेट केरळ गाठून दोन संशयित आरोपी बाबु व्ही. आर. रमन पिल्ले (वय ५४), आकाश एस. कांत श्रीकांत (वय १८) यांना ताब्यात घेतले आहे. त्यानंतर त्यांच्या चौकशीत धक्कादायक माहिती समोर आली की, ही टोळी पुन्हा नाशिकमध्ये मोठा दरोडा टाकण्याच्या तयारीत आहे.

आरोपींची चौकशी करून त्यांच्या इतर साथीदारांबाबत माहिती घेतली असता, ते पुन्हा नाशिक जिल्ह्यात लुटमार करण्याच्या उद्देशाने महाराष्ट्रात गेले असल्याचे त्यांनी सांगितले. या माहितीची खात्री केली असता, त्यांचे साथीदार हे महामार्गावरील वाहनांची लुट करण्याच्या उद्देशाने सिन्नर तालुक्यातील नाशिक-पुणे महामार्गालगत चारचाकी वाहनांमध्ये दबा धरून थांबलेले असल्याची खात्री झाली.

यानंतर स्थानिक गुन्हे शाखा आणि सिन्नर पोलिसांचे पथकांनी संयुक्तपणे छापा टाकून यातील नियास मुहम्मद अली (वय २६), मुहम्मद आदिल अब्दुल माजिद (वय २५), अनिलकुमार करूणाकरा कुरूप (वय ४७), सबरीनाथ विनु के. व्ही (वय २४), आसिफ हमीद (वय ४०), अब्दुल हमीद नासर (वय ३४), शहारूख पी.एस. शहाजहान (वय २६), सिरल बाबु मजिद (वय ४०), अरुणकुमार के. (वय ४४), सबीश व्ही. एस. संतोष (वय ४०), यांना ताब्यात घेतले आहे. तर इतर ०५ साथीदार हे फरार असून पोलिस त्याचा शोध घेत आहेत.

पोलिसांनी या संशयितांकडून लोखंडी तलवारी, कोयते, टोकदार चाकू आणि मिरची पूड तसेच टोयोटा एटीओस, मारुती स्विफ्ट आणि होंडा सिटी यांसारख्या 4 महागड्या गाड्या असा एकूण 19 लाख 55 हजार 300 रुपये किंमतीचा मुद्देमाल जप्त केला आहे. या टोळीने महाराष्ट्रच नव्हे तर राजस्थान, मध्य प्रदेश आणि उत्तर प्रदेशातही गुन्हे केल्याची कबुली दिली आहे.