नंदुरबार शहरात गेल्या सात वर्षांपासून सुरू असलेला बनावट जन्म-मृत्यू प्रमाणपत्रांचा मोठा गैरप्रकार उघडकीस आला असून, सायबर कॅफेमधून बनावट सरकारी शिक्क्यांचा वापर करून बोगस दाखले तयार केले जात असल्याची धक्कादायक बाब समोर आली आहे.
नंदुरबार शहरातील शास्त्री मार्केट परिसरात असलेल्या आर. के. ऑनलाइन सायबर कॅफे येथून हा गैरप्रकार चालत असल्याचे तपासात निष्पन्न झाले. पोलिस निरीक्षक नीलेश देसले यांना मिळालेल्या गोपनीय माहितीनुसार, २९ जानेवारी रोजी पोलिसांनी छापा टाकत कारवाई केली. या कारवाईत बनावट सरकारी शिक्के, जन्म-मृत्यूचे बनावट दाखले, लॅपटॉप, प्रिंटर, संगणक व पाच मोबाइल असा मुद्देमाल जप्त करण्यात आला.
अनिल यशवंत कोळी (न. प. ऑपरेटर), रिजवान सुभान खान (सायबर कॅफेचालक), इमरान याकूब पिंजारी (वकील), लाला ऊर्फ मोहम्मद अली मोहम्मद युसूफ पटेल (नगरपरिषद शिपाई) आणि शेख शफिक शेख इसाक कुरेशी ( सायबर कॅफेशी संबंधित ) अशी आरोपींची नावे आहेत.
नगरपरिषदेचे स्वच्छता निरीक्षक तथा जन्म-मृत्यू नोंद विभागाचा अतिरिक्त कार्यभार असलेले युवराज श्रीपत चव्हाण यांच्या फिर्यादीवरून शहर पोलिस ठाण्यात गुन्हा दाखल करण्यात आला आहे. अटक केलेल्या आरोपींना न्यायालयाने ९ फेब्रुवारीपर्यंत पोलिस कोठडी सुनावली आहे .
या प्रकरणात आणखी काही जणांचा सहभाग आहे का, याचा शोध घेतला जात आहे. नागरिकांनी सरकारी प्रमाणपत्रांसाठी केवळ अधिकृत कार्यालये व सरकारमान्य केंद्रांशीच संपर्क साधावा. कोणतीही संशयास्पद बाब आढळल्यास पोलिस ठाण्याशी संपर्क साधावा. – श्रवण दत्त. एस, जिल्हा पोलिस अधीक्षक