भाजप कोअर कमिटीची बैठक

आज रात्री उशीरा पुण्यात भाजपच्या कोअर कमिटीची अत्यंत महत्वाची बैठक पार पडली आहे, प्रदेशाध्यक्ष रविंद्र चव्हाण हे या बैठकीला उपस्थित होते. या बैठकीमध्ये पुण्याच्या महापौरपदासाठी संभाव्य नावे निश्चित करण्यात आली आणि त्यांच्यावर चर्चा पार पडली आहे. असं असलं तरी महापौर कोण होणार हा संस्पेन्स अजिबात संपलेला नाही. याबाबतचा अंतिम निर्णय मुख्यमंत्री फडणवीस घेणार असल्याचे समोर आले आहे. उद्या महापौर, उपमहापौर पदासाठी भाजपकडून उमेदवारांचा अर्ज दाखल केला जाणार आहे.

बैठकीला ‘यांची’ उपस्थिती

दरम्यान, या भाजपच्या या बैठकीला कोअर कमिटीच्या बैठकीला प्रदेशाध्यक्ष चव्हाण यांच्यासह मंत्री चंद्रकांत पाटील, माधुरी मिसाळ, सभागृह नेते गणेश बिडकर, शहराध्यक्ष धीरज घाटे यांचेसह प्रमुख पदाधिकारी उपस्थित होते.

महिला नगरसेवकांमध्ये रस्सीखेच

पुणे महापौर पदासाठी मंजुषा नागपुरे, वर्षा तापकिर, मानसी देशपांडे या तीन महिला नगरसेवकांमध्ये पदासाठी जोरदार रस्सीखेच पाहायला मिळत आहे. पण असं असलं तरीही ऐनवेळी चौथाच डार्क हॉर्स महिला उमेदवार वरिष्ठांच्या आशिर्वादाने बाजी मारणार का याकडेही पुणे भाजपच्या कार्यकर्त्यांसह नागरिकांचे लक्ष लागले आहे.

दरम्यान, या तिन्ही नगरसेवकांनी आपआपल्या परिने मोर्चेबांधणी केली असून कोणाचे नशीब उजळणार हे पाहणेही तितकेच महत्वाचे ठरणार आहे. भाजपमध्ये अनेकदा अनपेक्षित निर्णय घेतले गेलेले आहेत, त्यामुळे यावेळीही तसं काही होणार का? याकडे महाराष्ट्राचं लक्ष लागलेलं आहे.

मुख्यमंत्री फडणवीस घेणार निर्णय

दरम्यान, पुणे महापालिका महापौर पदाचा अंतिम निर्णय आज रात्री मुख्यमंत्री फडणवीस घेणार आहेत. पक्षनिष्ठा, कामाचा अनुभव आणि आगामी निवडणुकांचे समि‍करणे लक्षात घेऊनच या पदावरील व्यक्तीची निवड केली जाऊ शकते अशी चर्चाही राजकीय वर्तुळात रंगली आहे.