दुसरीकडे राज ठाकरेंची मनसे मुंबईत भाजपला पाठिंबा देणार असल्याची चर्चा सुरु झाली. कल्याण-डोंबिवलीत शिवसेना उबाठासोबत युतीत लढलेल्या मनसेनं निकाल लागताच शिंदेसेनेला पाठिंबा दिला आणि सत्तेत जाण्याची तयारी केली. त्यानंतर राज ठाकरेंनी बाळासाहेब ठाकरे यांच्या जयंती निमित्त केलेल्या पोस्टमध्ये लवचिक निर्णयांचा उल्लेख होता. त्यातच मुंबईत मनसे भाजपला पाठिंबा देणार असल्याच्या चर्चेनं वेग घेतला. यावर खुद्द राज ठाकरेंनी भाष्य केलं. आम्ही भाजपला पाठिंबा देणार नाही, हे मी स्वत: सांगतोय, असं म्हणत राज यांनी राजकीय चर्चांना पूर्णविराम दिला.