तुम्हाला यायचेच असेल, तर अजित पवार यांच्या राष्ट्रवादी काँग्रेसच्या माध्यमातून केंद्रात आणि राज्यात या, असा निरोप देण्यात आला होता. आपला आग्रह मान्य होत नसल्याने पक्षाच्या नेतृत्वानेही काहीसे नाराज होतच अजित पवार यांच्यासोबत चर्चेच्या फेऱ्या सुरू केल्या होत्या.

अजित पवार यांचे मंगळवारी अपघाती निधन झाल्यानंतर मात्र, पवार कुटुंबीयांचे प्रमुख म्हणून शरद पवार कदाचित या दोन्ही पक्षांचे नेतृत्व करतील, अशी शक्यता निर्माण झाल्यानंतर तातडीने दिल्लीवरून चक्रे फिरली. त्यानुसार राज्यातील भाजपच्या नेतृत्वाने तातडीने पक्षाची धुरा सहीसलामत अजित पवार यांच्या पत्नी सुनेत्रा पवार यांच्याकडेच जातील याची रणनीती आखली.
भाजपच्या या खेळीने राष्ट्रवादी-शप पक्षाचे नेतृत्व अस्वस्थ झाल्याच्या चर्चेलाही आता तोंड फुटले आहे. शरद पवार यांनी शनिवारी बारामतीत प्रसारमाध्यमांच्या प्रतिनिधींशी संवाद साधताना सुनेत्रा पवार यांच्या शपथविधीबद्दल आपल्याला काहीच माहीत नसल्याचे सांगितले. स्वतः सुनेत्रा पवार यांनी कोणतीच चर्चा केली नाही. असा निर्णय घेण्यासाठी इतकी घाई का केली जात आहे, अशी विचारणा करतानाच पवार यांनी या निर्णयामागे सुनील तटकरे आणि प्रफुल्ल पटेल असावेत, अशी शंकाही व्यक्त केली. दोन्ही राष्ट्रवादी पक्षांची सूत्रे गेली असती, तर त्यांनी प्रामुख्याने केंद्रात आणि राज्यात भाजपला नियंत्रणात आणण्याचा प्रयत्न केला असता. त्यामुळे एकूणच राजकारणाला पवार यांच्याकडून वेगळी कलाटणी देण्याचा प्रयत्न होऊ नये, यासाठीच भाजपने पडद्यामागून सूत्रे हलविताना पक्षाच्या नेता निवडीपासून उपमुख्यमंत्रिपद देण्यापर्यंच्या एकूणच कार्यवाहीला प्रचंड गती दिल्याचे बोलले जात आहे.