नांदेड
नांदेड जिल्ह्यातील हदगाव शहरात एक अत्यंत संतापजनक आणि माणुसकीला काळिमा फासणारी घटना उघडकीस आली आहे. आपल्या अनैतिक संबंधांत अडथळा ठरणाऱ्या सासूचा सुनेने चक्क प्रियकराच्या मदतीने गळा आवळून खून केला. इतकेच नव्हे, तर खुनाचा पुरावा नष्ट करण्यासाठी भावाच्या मदतीने मृतदेह शहराबाहेर नदीपात्रात फेकून दिला. पोलिसांनी सीसीटीव्ही फुटेज आणि मोबाईल लोकेशनच्या आधारे १३ दिवसांनी या गुन्ह्याचा छडा लावत सुनेसह चौघांना बेड्या ठोकल्या आहेत.
पतीच्या निधनानंतर वाढली जवळीकता
मयत कमलाबाई क्षीरसागर (वय ५४) या हदगाव तहसील कार्यालयात शिपाई म्हणून कार्यरत होत्या. त्यांच्या एकुलत्या एक मुलाचे दोन महिन्यांपूर्वीच आजारपणामुळे निधन झाले होते. तेव्हापासून विधवा सून सुनीता (वय ३५) आणि कमलाबाई एकत्र राहत होत्या.
मात्र, सुनीताचे गेल्या अनेक वर्षांपासून स्वतःपेक्षा ८ वर्ष लहान असलेल्या परमेश्वर वानखेडे (वय २६) याच्याशी प्रेमसंबंध होते. पतीच्या निधनानंतर हे संबंध अधिकच वाढले होते.
झोपेतच स्कार्पने आवळला गळा
सुनीताच्या या वागण्यामुळे सासू-सुनेमध्ये सतत खटके उडत होते. अनैतिक संबंधांत सासू अडथळा ठरत असल्याच्या रागातून सुनेने प्रियकरासोबत हत्येचा कट रचला. १० जानेवारीच्या रात्री कमलाबाई गाढ झोपेत असताना सुनीता आणि परमेश्वरने त्यांच्या गळ्याला स्कार्प गुंडाळून त्यांचा जीव घेतला. त्यानंतर सुनीताने आपला भाऊ अमोल इटकरे याला बोलावून घेतले आणि नातेवाईक अक्षय कदमच्या मदतीने मृतदेह पोत्यात भरून वाळकी फाटा येथील नदीपात्रात फेकून दिला.
पोलिसांच्या नजरेतून आरोपी सुटले नाहीत
१३ जानेवारीला नातवाने कमलाबाई बेपत्ता असल्याची तक्रार दिली, पण काही वेळातच त्यांचा मृतदेह सापडल्याने हत्येचा संशय बळावला. सहाय्यक पोलीस निरीक्षक संकेत दिघे यांच्या पथकाने तांत्रिक तपास सुरू केला.
सीसीटीव्ही आणि मोबाईल लोकेशनमध्ये सुनीताचा प्रियकर आणि भावाच्या हालचाली संशयास्पद आढळल्या. कसून चौकशी केली असता सुनेने हत्येची कबुली दिली. न्यायालयाने चारही आरोपींना २८ जानेवारीपर्यंत पोलीस कोठडी सुनावली आहे.