कल्याण-डोंबिवली महापालिका निवडणुकीच्या निकालानंतर महापौर पदासाठी रस्सीखेच सुरु आहे. आज सकाळी शिंदेसेनेचे खासदार आणि उपमुख्यमंत्री एकनाथ शिंदे यांचे चिरंजीव श्रीकांत शिंदे नवी मुंबईतील बेलापूरला पोहोचले होते. सेनेच्या ५३ नगरसेवकांना घेऊन शिंदे त्यांचा गट स्थापन करण्यासाठी गेले होते. त्याचवेळी तिथे मनसेचे नेते आणि माजी आमदार राजू पाटीलही दाखल झाले. त्यांच्या सोबत मनसेचे ५ नगरसेवकदेखील होते. मनसेच्या नगरसेवकांचा गट स्थापन करण्यासाठी पाटील कोकण भवनला गेले होते.

आपापल्या पक्षांच्या नगरसेवकांचा गट स्थापन करण्यासाठी पोहोचलेल्या श्रीकांत शिंदे आणि राजू पाटील यांची बैठक झाली. त्यानंतर श्रीकांत शिंदे यांनी माध्यमांशी संवाद साधला. मनसे नं कल्याण-डोंबिवलीत शिवसेनेला पाठिंबा दिला असल्याचं शिंदे यांनी सांगितलं. मनसे आणि शिवसेना उबाठा यांनी सोबत निवडणूक लढवली होती. ठाकरे बंधू महायुतीच्या विरोधात लढले होते. पण आता मनसेनं शिंदेसेनेलाच पाठिंबा जाहीर केला आहे.

मनसे सोबतच उद्धव ठाकरेंच्या शिवसेनेच्या ४ फुटीर नगरसेवकांनी शिंदेसेनेला पाठिंबा दिला आहे. शिंदेसेनेचे ५३, मनसेचे ५, ठाकरेसेनेचे ४ फुटीर नगरसेवक असं एकूण ६२ चं संख्याबळ शिंदेसेनेकडे आहे. शरद पवारांच्या राष्ट्रवादी काँग्रेसनंदेखील शिंदेसेनेला समर्थन दिलं आहे. त्यांचा १ नगरसेवक आहे. २ नगरसेवक असलेल्या काँग्रेसनं शिंदेसेनेला बाहेरुन पाठिंबा दिला आहे. त्यामुळे शिंदेसेनेचं संख्याबळ ६५ वर गेलं आहे.

कल्याण-डोंबिवलीत महापालिकेतील एकूण सदस्यसंख्या १२२ इतकी आहे. बहुमतासाठी ६२ चा आकडा गाठणं गरजेचं आहे. श्रीकांत शिंदे यांनी जुळवाजुळव करत हा आकडा पार केला आहे. जवळपास सगळेच पक्ष एकाएकी शिंदेसेनेच्या बाजूनं फिरले आहेत. उद्धव ठाकरेंचे ११ जण विजयी झाले. त्यातील ७ नगरसेवक ठाकरेंसोबत आहेत. त्यांनी गट स्थापन केला आहे. बाकी सगळ्याच पक्षांनी शिंदेसेनेला पाठिंबा दिला आहे.