महापालिकेत भाजप-शिवसेना महायुतीचा महापौर बसेल एवढे संख्याबळ महायुतीकडे असले, तरी उपमुख्यमंत्री शिंदे यांनी आपल्या नगरसेवकांना पंचतारांकित हॉटेलमध्ये ठेवले आहे. त्यामुळे महापौरपदाच्या निवडणुकीत फाटाफूट होणार की काय, अशी चर्चा रंगली आहे. विरोधकांकडे संख्याबळ नसल्याने त्यांचा महापौर सहजासहजी बसणार नाही, हे निकालादिवशीच स्पष्ट झाले होते. मात्र आणखी काही नगरसेवक जोडले, तर तेही शक्य होईल, अशा चर्चांना दुसऱ्या दिवशी जोर आला. अशावेळी उपमुख्यमंत्री एकनाथ शिंदे यांनी आपल्या नगरसेवकांना ताज लॅण्ड्स एण्ड हॉटेलमध्ये मुक्कामी हलवले.

तोच खेळा पुन्हा! भाईंनी संधी ओळखून डाव टाकला, भाजपला कुठवर खेचणार? आऊट’स्टँडिंग’ कामगिरी जमणार?
वास्तविक शिंदे यांच्या नगरसेवकांना शिबिराच्या निमित्ताने मुक्कामी ठेवल्याची माहिती पुढे आली असली, तरी सोमवारी इतर राजकीय पक्षांनीही त्यांच्या नगरसेवकांची खबरदारी घ्यायला सुरुवात केली आहे. भाजपने त्यांच्या नवनिर्वाचित नगरसेवकांसाठी महत्त्वाचे फर्मान काढल्याची माहिती पुढे आली. सगळ्या नगरसेवकांना मुंबईतच थांबण्याच्या सूचना देण्यात आल्या असून पुढील १० दिवस मुंबई सोडू नका, अशा सूचना भाजपच्या नेतृत्वाने दिल्याचे समजते. आपत्कालीन परिस्थितीत शहर सोडायची गरज भासल्यास पक्षाच्या वरिष्ठ नेत्यांना त्याबद्दल आधीच कल्पना द्या, अशीही सूचना करण्यात आल्याचे कळते.

Corporator Salary : तुमच्या नगरसेवकाला किती पगार मिळतो, कोणत्या सुविधा मिळतात? स्वेच्छा निधीचा आकडा माहितीये का?
दुसरीकडे शिवसेना उबाठाच्या नगरसेवकांनाही पक्षनेतृत्वाने विभागप्रमुखांच्या माध्यमातून सूचना दिल्याचे समजते. पक्षाच्या नगरसेवकांनी एकटे फिरू नये, सोबत पक्षाच्या पदाधिकाऱ्यांना घेऊनच फिरावे, असे आदेश दिल्याचे समजते.

ठाणे महापौरपदावर भाजपचा दावा
ठाणे : ‘ठाणेकरांना निर्धारनाम्यामध्ये दिलेला शब्द पूर्ण करण्यासाठी आम्हाला महत्त्वाची पदे आवश्यक आहेत. त्यासाठी दोन वर्षांकरिता महापौरपद मिळावे’, अशी मागणी ठाणे भाजप निवडणूक प्रभारी, आमदार निरंजन डावखरे यांनी केली. ‘ठाण्यातील युतीत आम्हाला ४० जागा मिळाल्या. त्यातील सात जागा मुंब्रा व तीन राबोडी अशा मुस्मिलबहुल भागात होत्या. उर्वरित जागांपैकी २८ जागा आम्ही जिंकल्या, आमचा शंभर टक्के स्ट्राइक रेट आहे. महापौर, स्थायी समिती सभापती, सभागृह नेते अशी पदे आम्हाला गरजेची आहेत. अन्यथा वेगळी भूमिका घ्यावी लागेल,’ असे डावखरे म्हणाले.