शिंदेसेनेचे मुंबईतील नवनिर्वाचित नगरसेवक गेल्या शनिवारपासून हॉटेलमध्ये वास्तव्यास आहेत. मुंबई महापालिकेत भाजपला शिंदेसेनेच्या मदतीशिवाय बहुमताचा आकडा गाठता येणं शक्य नाही. त्यामुळे शिंदेसेनेच्या नगरसेवकांना असलेलं महत्त्व वाढलं आहे. संभाव्य फाटाफूट लक्षात घेता शिंदेसेनेनं त्यांच्या नगरसेवकांना पंचतारांकित हॉटेलात ठेवलं आहे. त्यांचा गट स्थापन करण्याच्या हालचालींना वेग आला आहे. त्यांच्याकडून या संदर्भात शपथपत्रं घेतली जातील.

एकीकडे शिंदेसेनेच्या गोटात हालचालींना वेग आलेला असताना दुसरीकडे भाजपनंही महत्त्वाचं पाऊल उचललं आहे. मुंबई भाजपनं त्यांच्या नवनिर्वाचित नगरसेवकांसाठी महत्त्वाचं फर्मान काढलं आहे. सगळ्या नगरसेवकांना मुंबईतच थांबण्याच्या सूचना देण्यात आल्या आहेत. पुढील १० दिवस मुंबई सोडू नका, अशा सूचना भाजपनं दिल्या आहेत. आपत्कालीन परिस्थिती निर्माण झाल्यास, त्यासाठी शहर सोडायची गरज भासल्यास पक्षाच्या वरिष्ठ नेत्यांना त्याबद्दल आधीच कल्पना द्या, अशी सूचना करण्यात आली आहे.

मुंबई महापालिकेची महापौरपदाची निवडणूक येत्या ८ ते १० दिवसांत होण्याची दाट शक्यता आहे. त्यामुळे सतर्कतेचा इशारा म्हणून भाजपनं आपल्या सगळ्या नगरसेवकांना मुंबईतच थांबण्याच्या सूचना केल्या असल्याची माहिती सुत्रांनी दिली आहे. मुख्यमंत्री देवेंद्र फडणवीस सध्या वर्ल्ड इकॉनॉमिक फोरमच्या वार्षिक बैठकीसाठी स्वित्झर्लंडच्या दावोसला गेले आहेत. दोनच दिवसांपूर्वी ते रवाना झाले. २४ जानेवारीपर्यंत ते मुंबईत परततील. त्यानंतर महापौरपदासह अन्य महत्त्वाच्या पदासंदर्भातील वाटाघाटी मार्गी लागण्याची शक्यता आहे.