बीड जिल्ह्यातील पेंडगाव येथे अमावास्येनिमित्त देवदर्शनाचे मोठे महत्त्व असते. याच श्रद्धाभावातून मंगरूळ क्रमांक 2 येथील अमर पंडितराव बापमारे (वय वर्ष 26) आणि नाना उद्धव बापमारे हे दोन तरुण शनिवारी दुपारी 12 च्या सुमारास दुचाकीवरून देवदर्शनासाठी निघाले होते. माजलगावकडून गढीच्या दिशेने जात असताना, जातेगाव फाटा परिसरात त्यांच्या दुचाकीला पाठीमागून येणाऱ्या उसाच्या ट्रकने (क्र. एमएच 11 एएल 0518) भीषण धडक दिली.
Beed Crime: वरिष्ठ जीएसटी अधिकारी कारमध्ये मृतावस्थेत आढळले, 24 तासांपासून होते बेपत्ता, बीडमध्ये खळबळ

एकाचा जागीच मृत्यू तर एक गंभीर

हा अपघात एवढा भीषण होती की, दुचाकीचालक अमर बापमारे याचा जागीच मृत्यू झाला आहे. ऐन विशीतल्या तरुणाचा असा दुर्दैवी अंत झाल्याने बापमारे कुटुंबावर दुःखाचा डोंगर कोसळला आहे. या अपघातात दुसरा तरुण, नाना बापमारे हा गंभीर जखमी झाला असून त्याचा पाय फॅक्चर झाला आहे. त्याला तातडीने जवळच्या रुग्णालयात उपचारासाठी दाखल करण्यात आले आहे.

घटनास्थळी पोलीस दाखल

अपघातानंतर स्थानिक नागरिकांनी तातडीने धाव घेत मदतकार्य केले आणि तलवाडा पोलिस ठाण्याला माहिती दिली. पोलिसांनी तातडीने घटनास्थळी पोहोचून पंचनामा केला आणि वाहतूक सुरळीत केली आहे. या प्रकरणी पोलिसांनी ट्रक चालकाविरुद्ध गुन्हा दाखल करण्याची प्रक्रिया सुरू केली असून, तलवाडा पोलिस पुढील तपास करत आहेत. रस्त्यावरील अवजड वाहनांची वर्दळ आणि वेगमर्यादेचे उल्लंघन यामुळे अशा घटना वारंवार घडत असल्याचे बोलले जात आहे. या अपघातामुळे मंगरूळ गावात शोककळा पसरली आहे. पुढील तपास गेवराई तालुक्यातील तलवाडा पोलीस करत आहेत. या घटनेने परिसरात एकच खळबळ माजली आहे.