नवी मुंबई, मिरा-भाईंदर, पनवेल, पुणे, पिंपरी चिंचवड, नाशिक, कोल्हापूर, छत्रपती संभाजीनगर, अहिल्यानगर, नांदेड, नागपूर, अकोला, अमरावती, जालना, धुळे, नांदेड, सोलापूर, सांगली, इचलकरंजी आदी २३ महापालिकांमध्ये भाजपने आघाडी घेतली. मात्र त्यातही छत्रपती संभाजीनगर महानगरपालिकेत भाजपने चमत्कार केला. दशकानुदशके शिवसेनेचा गड राहिलेल्या या शहरात यावेळी भाजपने सुरुंग लावला आहे. शिवसेनेचे नेते आणि मंत्री संजय शिरसाट तसेच खासदार संदीपान भुमरे यांनाही त्यांनी धक्का दिला आहे. असे असले तरी ज्या भाजपने मागच्या विधानसभेला वसई-विरारमध्ये बहुजन विकास आघाडीला (बविआ) चारीमुंड्या चीत केले होते, तिथे बविआच्या हितेंद्र ठाकूर यांनी वसई-विरार महापालिकेत सत्ता राखत भाजपला विजयापासून रोखले आहे.
इतर पक्षांतील वजनदार उमदेवारांचा पक्षात प्रवेश करून घेतला. त्याचवेळी पक्षात बंडखोर तयार होणार नाहीत, याचीही खातरजमा करून घेतली. यामुळे अनेक ठिकाणी पक्षाचा विजय सहजसोपा झाला.
या निवडणुकीत भाजपचा चेहरा हे देवेंद्र फडणवीसच होते. त्यांनी महत्त्वाच्या महापालिकांमध्ये प्रचारसभा घेतल्या. रोड शो, पदयात्रा, प्रकट मुलाखती या माध्यमातून फडणवीस यांनी भाजपचा विकासाचा अजेंडा मतदारांपर्यंत पोहोचवला. मतदारांनी त्याला सकारात्मक प्रतिसाद दिला