महापालिकेत प्रथमच सत्ता मिळाल्यानंतर मुक्ता टिळक यांच्यासारख्या पक्षाशी कायम एकनिष्ठ राहिलेल्या आणि निरपेक्ष भावनेने काम करणाऱ्या व्यक्तीला महापौरपदाचा मान मिळाला. दुर्दैवाने, त्यांना आजारपणामुळे अनेकदा महापालिकेत येताही येत नव्हते. त्यानंतर मुरलीधर मोहोळ यांना महापौर म्हणून काम करण्याची संधी मिळाली. त्यांच्या काळात करोनाची साथ पसरली होती. या कालावधीत महापौर म्हणून पुणेकरांसाठी विविध सुविधा निर्माण करून करून देण्यात त्यांनी मोलाची कामगिरी बजावली.
महापालिका निवडणुकीचा निकाल लागून नवे सत्ताधारी कोण हे स्पष्ट झाले असले, तरी अद्याप महापौरपदाचे आरक्षण अद्याप जाहीर झालेले नाही. त्यामुळे पुढील काही दिवसांत ही प्रक्रिया पूर्ण झाल्यानंतरच महापौरपदासाठी कोणाला नेमकी संधी मिळणार, हे स्पष्ट होणार आहे. पुणे महापालिकेत गेल्या दोन वेळा महापौरपद सर्वसाधारण गटासाठी राखीव होते. त्यामुळे या निकालानंतर आता महापौरपदाची सोडत कधी निघणार, यार्च याची उत्सुकता सर्वांनाच लागली आहे. हे आरक्षण पडण्यासाठी किमान दोन ते तीन आठवड्यांची प्रतीक्षा करावी लागणार आहे.महापालिकेचे माजी सभागृह नेते आणि शहराध्यक्ष धीरज घाटे, निवडणूक प्रमुख गणेश बीडकर यांच्यासह माजी सभागृहनेते श्रीनाथ भिमाले, वर्षा तापकीर, माजी उपमहापौर प्रसन्न जगताप, राजेंद्र शिळीमकर, मानसी देशपांडे, मंजूषा नागपुरे, अनिल टिंगरे, योगेश मुळीक अशा भाजपच्या वरिष्ठ नेत्यांसह बाळा ओसवाल, पृथ्वीराज सुतार, सचिन दोडके आदी अन्य पक्षांतून काही महिन्यांपूर्वी भाजपमध्ये डेरेदाखल झालेल्या नेत्यांनाही महापालिकेच्या कारभाराची जाण आहे. त्यामुळे नेमकी संधी कोणाला मिळणार ही चर्चा सुरू झाली असून, पुढील काही दिवस ती तशीच सुरू राहण्याची शक्यता आहे.