२०२४ मध्ये विधानसभा निवडणुकीत शिंदे यांनी सरवणकर यांना पुन्हा एकदा माहीममधून तिकीट दिलं. याच मतदारसंघातून मनसे प्रमुख राज ठाकरेंनी त्यांचे पुत्र अमित ठाकरे यांना निवडणुकीच्या आखाड्यात उतरवलं. लोकसभा निवडणुकीत मनसेनं महायुतीला पाठिंबा दिला होता. शिंदे यांचे पुत्र श्रीकांत यांच्यासाठी राज ठाकरेंनी ठाण्यात जाहीर सभा घेतली होती. त्यामुळे शिंदे माहीममध्ये ठाकरेंना सहकार्य करतील, अशी मनसेच्या नेत्यांची अपेक्षा होती. पण ती फोल ठरली.
विधानसभा निवडणुकीत उद्धव ठाकरेंनी सरवणकरांना पहिला दणका दिला. अमित ठाकरे विरुद्ध सदा सरवणकर यांच्या लढतीची चर्चा असताना ठाकरेंनी त्यांच्या विभागप्रमुखाला तिकीट दिलं. महेश सावंत यांनी सरवणकर यांचा अटीतटीच्या लढतीत पराभव केला. सरवणकर माजी आमदार झाले. यानंतर सरवणकर यांनी त्यांच्या पुढच्या पिढीसाठी महापालिकेची तयारी सुरु केली.
सरवणकर यांचे पुत्र समाधान यांना शिंदेसेनेनं प्रभाग क्रमांक १९४ मधून तिकीट दिलं. त्यांच्या विरोधात उद्धव ठाकरेंनी निशिकांत शिंदे यांना उमेदवारी दिली. तर सरवणकर यांची कन्या प्रिया गुरव-सरवणकर प्रभाग क्रमांक १९१ मधून लढल्या. त्यांच्या समोर ठाकरेंनी माजी महापौर आणि माजी आमदार विशाखा राऊत यांना संधी दिली. ठाकरेंचे दोन्ही उमेदवार विजयी झाले. सरवणकर यांची दोन्ही मुलं पराभूत झाली. सरवणकर कुटुंबानं गेल्या सव्वा वर्षात तीन पराभव पाहिले आहेत. सरवणकर यांना ठाकरे यांच्या सोबतचा पंगा महागात पडला आहे.