पुणे महापालिकेत ४१ प्रभागांतून १६५ नगरसेवक आणि पिंपरी-चिंचवड महापालिकेतून ३२ प्रभागांतून १२८ लोकप्रतिनिधी निवडण्यासाठी गुरुवारी मतदान झाले. पुणे आणि पिंपरीतील सहा हजारांहून अधिक मतदान केंद्रांवर सकाळी साडेसात वाजता मतदानाला सुरुवात झाली. मॉर्निंग वॉक केल्यानंतर लगेच मतदान करण्यासाठी येणाऱ्या मतदारांची संख्या सध्या वाढत असल्याने सकाळच्या टप्प्यांत काही केंद्रांवर चांगली गर्दी झाली होती. मतदारांमधील हा उत्साह सकाळी १० पर्यंत कायम राहिला होता. त्यानंतर, काही मतदान केंद्रांवर मतदान संथ गतीने सुरू होते. दुपारी चारनंतर अखेरच्या तास-दीड तासामध्ये मतदानाला पुन्हा वेग आल्याने पुन्हा काही केंद्रांवर रांगा लागल्या. विशेषतः झोपडपट्टीबहुल भागांत हे प्रमाण अधिक होते. पुणे आणि पिंपरी-चिंचवड या दोन्ही महापालिकांमध्ये अनुक्रमे ५५ व ६० टक्के मतदान झाल्याचा प्राथमिक अंदाज आहे.
Pune Election Exit Poll 2026: पुण्याचा नवा ‘कारभारी’ कोण होणार? पुणे महापालिका एक्झिट पोलची मोठी आकडेवारी समोर
पुणे आणि पिंपरी-चिंचवड या दोन्ही शहरांमध्ये राज्यात महायुतीमध्ये एकत्र असणारे तीन पक्ष निवडणुकीला स्वतंत्र अथवा नव्या मित्रांसोबत निवडणुकाला सामोरे गेले. तर, महाविकास आघाडीतील सर्व घटक पक्षांमध्ये फाटाफूट झाली. भाजपने रिपब्लिकन पार्टी ऑफ इंडियासोबत युती केली; तर राष्ट्रवादी काँग्रेसने राष्ट्रवादी काँग्रेस-शरदचंद्र पवार पक्षासोबत आघाडी करून निवडणूक लढवली. काँग्रेसने शिवसेनेबरोबर (उबाठा) युती करून महाराष्ट्र नवनिर्माण सेनेला त्यात सहभागी करून घेतले होते. पुणे आणि पिंपरीतील विकासकामे आणि भ्रष्टाचार यावरून पुण्यात भाजप आणि राष्ट्रवादी काँग्रेसमध्ये कलगीतुरा रंगला होता.

तीन तासांत पहिला निकाल ?
पुणे आणि पिंपरी-चिंचवड या दोन्ही महापालिकांसाठीची मतमोजणी शुक्रवारी सकाळी १० वाजता शहरातील विविध केंद्रांवर सुरू होणार आहे. या मतमोजणीसाठी निवडणूक शाखेने जय्यत तयारी केली असून, कोणताही अनुचित प्रकार घडू नये, यासाठी पोलिसांचा तगडा बंदोबस्त ठेवण्यात आला आहे. सुरुवातीला टपाली मतांची मोजणी झाल्यानंतर प्रत्यक्ष मतमोजणीला सुरुवात होणार आहे. विविध प्रभागांत झालेल्या मतदानानुसार १२ ते २० फेऱ्यांनंतर मतमोजणी पूर्ण होणार असून, पहिला अधिकृत निकाल तीन तासांमध्ये येईल, असा अंदाज वर्तविण्यात आला आहे.