प्रशासकीय यंत्रणा ऑन ड्युटी; ६४ हजार कर्मचाऱ्यांची नियुक्ती

निवडणूक प्रक्रियेसाठी मुंबईत एकूण १० हजार २३१ मतदान केंद्रे उभारण्यात आली आहेत. या प्रक्रियेच्या यशस्वी अंमलबजावणीसाठी प्रशासनाने ६४ हजार ३७५ अधिकारी व कर्मचाऱ्यांची नियुक्ती केली आहे. आज २३ विभागीय केंद्रांवरून मतदान साहित्य वाटपाची प्रक्रिया पार पडली. अतिरिक्त महानगरपालिका आयुक्त अश्विनी जोशी यांनी अंधेरी येथील क्रीडा संकुलात जाऊन प्रत्यक्ष पाहणी केली. मतपेट्या, शाई, सील आणि मतदार यादीसह सर्व पथके आपल्या नियोजित केंद्रांकडे रवाना झाली आहेत.

Election News: वसई फाट्यावर पैशांच्या पाकिटांचे वाटप उघड, मतदानाच्या पूर्वसंध्येला पुन्हा गंभीर प्रकार समोर

ठाकरे बंधू विरुद्ध महायुती: अस्तित्वाची लढाई

राज्यातील २९ महापालिकांच्या निवडणुका होत असल्या तरी सर्वांचे लक्ष मुंबई कोणाची? याकडे लागले आहे. भाजप आणि शिवसेना (शिंदे) यांची महायुती विरुद्ध उद्धव ठाकरे आणि राज ठाकरे यांच्या पक्षांमधील ही लढत ऐतिहासिक ठरणार आहे. १७०० उमेदवार मैदानात असून, त्यात शिवसेना (ठाकरे), शिवसेना (शिंदे), भाजप, काँग्रेस, मनसे राष्ट्रवादी काँग्रेस, वंचित बहुजन आघाडी या प्रमुख पक्षांसह तब्बल २९ पक्षांचे उमेदवार नशीब आजमावत आहेत.

उद्या मतदान, परवा निकाल!

यंदा राज्य निवडणूक आयोगाने मतदानानंतर लगेच दुसऱ्या दिवशी म्हणजेच १६ जानेवारी रोजी मतमोजणी जाहीर केली आहे. त्यामुळे निकालासाठी मुंबईकरांना फार वाट पाहावी लागणार नाही. मुंबई महानगरपालिका आयुक्त भूषण गगराणी यांनी सर्व पात्र मतदारांना निर्भयपणे घराबाहेर पडून आपला मतदानाचा हक्क बजावण्याचे आवाहन केले आहे.

चोख पोलीस बंदोबस्त

मतदानाच्या दिवशी कोणताही अनुचित प्रकार घडू नये, यासाठी मुंबई पोलिसांनी शहरात कडेकोट बंदोबस्त तैनात केला आहे. संवेदनशील केंद्रांवर अतिरिक्त कुमक लावण्यात आली असून भरारी पथकेही सक्रीय आहेत.