काय असतील सुविधा?

मुंबई मेट्रो वनने महिलांच्या मासिक पाळीशी संबंधित स्वच्छतेच्या गरजांचा विचार करत सिरोना (Sirona) या ब्रँडसोबत भागीदारी केली आहे. या उपक्रमाअंतर्गत मेट्रो लाईन-1 वरील प्रत्येक स्थानकावर महिलांच्या शौचालयांच्या बाहेर हायजीन वेंडिंग मशीन बसवण्यात येणार आहेत. या वेंडिंग मशीनमध्ये केवळ सॅनिटरी पॅड्सच नव्हे, तर मासिक पाळीच्या काळात उपयुक्त ठरणाऱ्या विविध वस्तू उपलब्ध असतील. यामध्ये टॅम्पन्स, पँटी लायनर्स, मेन्स्ट्रुअल कप तसेच पीरियड पँटीज यांचा समावेश आहे. त्यामुळे महिलांना त्यांच्या वैयक्तिक पसंतीनुसार आणि सोयीनुसार योग्य उत्पादन निवडण्याचा पर्याय मिळणार आहे.Dahisar Metro Station: मुंबईत पहिल्यांदाच स्टेशनवरून बदलता येणार मेट्रो लाईन; मिरा रोड-अंधेरी थेट प्रवास, कुठे आहे सुविधा?

Ghatkopar-Versova मार्गावर सेवा

विशेष म्हणजे, महिलांच्या स्वच्छतागृहांच्या अगदी बाहेर लावलेल्या या वेंडिंग मशीनमधील उत्पादने फक्त 10 रुपयांपासून सुरू होणाऱ्या किफायतशीर दरात उपलब्ध असतील. प्रवासादरम्यान अचानक गरज भासल्यास, महिलांना कोणत्याही अडचणीशिवाय, गोपनीयतेत आणि सहजपणे ही उत्पादने मिळू शकणार आहेत. या उपक्रमाबाबत मुंबई मेट्रो वनच्या अधिकृत लिंक्डइन हँडलवरून माहिती देण्यात आली आहे. त्या पोस्टमध्ये म्हटले आहे की, “आम्ही मासिक पाळीविषयीच्या संवादांना सामान्य करत आहोत आणि सार्वजनिक वाहतुकीसाठी नवा दर्जा स्थापित करत आहोत.”

या उपक्रमावर प्रतिक्रिया देताना मुंबई मेट्रो वनचे सीईओ श्यामंतक चौधरी म्हणाले, “मुंबई मेट्रो वनमध्ये ग्राहकांच्या सोयीला प्रत्येक निर्णयात प्राधान्य दिले जाते. आमच्या एकूण प्रवाशांमध्ये महिलांचा मोठा वाटा आहे. त्यामुळे त्यांच्या गरजा प्रवासाच्या अनुभवाचा अविभाज्य भाग बनवणे अत्यावश्यक आहे.”

ते पुढे म्हणाले, “सिरोनाच्या मल्टी-प्रोडक्ट हायजीन वेंडिंग मशीनच्या सुरुवातीमुळे महिलांना त्यांच्या पसंतीच्या स्वच्छता उत्पादनांपर्यंत सहज आणि गोपनीय प्रवेश मिळणार आहे. यामुळे जागतिक दर्जाच्या मेट्रो पायाभूत सुविधांप्रती असलेली आमची बांधिलकी अधिक दृढ होते.”