मुंबई महापालिकेसाठी प्रभाग २०९ मध्ये शिवसेना (शिंदे) पक्षाच्या यामिनी जाधव , मनसेच्या हसीना माहिमकर, हर्षला सुर्वे (राष्ट्रवादी काँग्रेस) राफिया दामोदी (काँग्रेस) यांच्यात लढत होत आहे. या निवडणुकीमध्ये कोण बाजी मारणार? याबाबत उत्सुकता निर्माण झाली आहे. यामिनी जाधव यांना गेल्या वर्षी झालेल्या लोकसभा निवडणुकीत ठाकरेंचे खासदार अरविंद सावंत यांच्याकडून, तर विधानसभा निवडणुकीत ठाकरेंचे आमदार मनोज जामसुतकर यांच्याकडून पराभवाचा धक्का बसला आहे. २०१९ मध्ये आमदारकी भूषवलेल्या यामिनी जाधव दोन निवडणुकात पराभूत झाल्यानंतर नगरसेविका होणार का, याकडे सर्वांचं लक्ष आहे.

उद्धव ठाकरे यांची साथ सोडून शिवसेना शिंदे गटात सामील झालेले स्थायी समितीचे माजी अध्यक्ष यशवंत जाधव यांनी पत्नी, माजी आमदार यामिनी जाधव यांना प्रभाग क्रमांक २०९ मधून निवडणुकीसाठी रिंगणात उतरवले आहे. २०१७ मध्ये ते स्वतः या प्रभागातून निवडून आले होते. यामिनी यांच्यासमोर मनसेच्या हसिना माहीमकर, काँग्रेसच्या रफिया डामुडी, राष्ट्रवादी काँग्रेसच्या हर्षदा सुर्वे, आम आदमी पार्टीच्या स्नेहा भोसले या उमेदवार आहेत. समाजवादी पक्षाच्या सीमा मुल्ला यांच्यासह नऊ अपक्ष उमेदवारांचाही सामना यामिनी जाधव यांना करावा लागणार आहे.
BMC Election : मुंबईचा पुढचा महापौर कोणत्या पक्षाचा? मटा ऑनलाईन पोलमध्ये 73 टक्के युजर्सचं एकमत, मराठी माणसाचा कल…
ठाकरे बंधू एकत्र येऊन विजयी होतात, की शिवसेना-भाजप यांची सरशी होते, की दोघांच्या भांडणात काँग्रेस-वंचित बाजी मारते, याचं उत्तर १६ जानेवारीला मिळेलच, परंतु त्याआधी महाराष्ट्र टाइम्स ऑनलाईनने नेटिझन्सचा कौल जाणून घेतला आहे.

मटा ऑनलाईन पोलमध्ये प्रश्न काय?

मुंबई महापालिकेच्या प्रभाग क्रमांक २०९ मध्ये कोण बाजी मारणार? असा प्रश्न मटाच्या ऑनलाईन पोलमध्ये विचारण्यात आला होता. शिवसेना (शिंदे) पक्षाच्या यामिनी जाधव, मनसेच्या हसीना माहिमकर, हर्षला सुर्वे (राष्ट्रवादी काँग्रेस) राफिया दामोदी (काँग्रेस) यांच्यात लढत आहे. या निवडणुकीत कोण बाजी मारणार? असा प्रश्न मटा ऑनलाईनच्या यूट्यूब चॅनलवर विचारण्यात आला होता. २४ तासांच्या कालावधीत जवळपास ९३ हजारांहून अधिक युजर्सनी मतदान केले, तर अनेक जणांनी कमेंट्समधून आपले मत मांडले आहे.
BMC Election : शिवसेनेच्या बालेकिल्ल्यात कुणाला कौल? मटा ऑनलाईन पोलमध्ये 82 टक्के युजर्सचं एकमत, ठाकरेंना सोडणाऱ्या अनिल कोकीळ यांना…

ऑनलाईन पोलचे निकाल काय?

हसीना माहिमकर (मनसे) यांच्या बाजूने ७५ टक्के म्हणजे जवळपास ७० हजार नेटिझन्सनी मतदान केले आहे. यामिनी जाधव (शिवसेना-शिंदे) यांना १५ टक्के म्हणजे अंदाजे १४ हजार जणांनी पाठिंबा दर्शवला आहे. तर राफिया दामोदी (काँग्रसे) यांना ६ टक्के म्हणजेच साधारण साडेपाच हजार जणांनी, तर हर्षला सुर्वे (राष्ट्रवादी काँग्रेस) यांना ४ टक्के म्हणजेच साडेतीन हजार जणांनी मतं दिली आहेत.

लक्षात घेण्याची गोष्ट म्हणजे ऑनलाईन पोलमधून महाराष्ट्र टाइम्स ऑनलाईनने केवळ नेटिझन्सच्या मताचा कौल घेतला आहे. या पोलमध्ये मतदान करणारे युजर्स हे मुंबई महापालिकेतील मतदार असतीलच, असे नाही. किंबहुना मुंबईसह महाराष्ट्र आणि देश-परदेशातील युजर्सनेही आपली मतं नोंदवली आहेत. त्यामुळे हे निकाल प्रत्यक्ष मुंबई महापालिका निवडणुकांच्या निकालाचे प्रतिबिंब मानण्याचा प्रश्नच नाही. केवळ ऑनलाईन जनतेचा कौल कुणाच्या बाजूने आहे, याचा अंदाज टीम मटा ऑनलाईनकडून घेतला गेला आहे. प्रत्यक्ष निकाल आणि मटा ऑनलाईनचे यूट्यूब पोल यांच्यात बरीच तफावतही आढळू शकते.