‘दोन भावांच्या एकत्र येण्याने नाशिकचा कायापालट’

सभेच्या सुरुवातीलाच उद्धव ठाकरे यांनी राज ठाकरे यांच्यासोबत व्यासपीठ शेअर केल्याबद्दल आनंद व्यक्त केला. “आज मला खूप आनंद होत आहे कारण माझा भाऊ राज माझ्यासोबत आहे. जेव्हा आम्ही एकत्र नव्हतो, तेव्हा ‘एकत्र का येत नाही?’ असे विचारले जायचे आणि आता आलो आहोत, तर ‘का आलात?’ असे विचारले जाते. आमच्या एकत्र येण्याची कोणीही चिंता करू नका,” अशा शब्दांत त्यांनी विरोधकांना सुनावले. राज ठाकरे यांनी नाशिक मनपाच्या सत्तेत असताना केलेल्या कामांचे कौतुक करत, मुंबई आणि नाशिकचा विकास अनुभव असलेल्या दोन शक्ती एकत्र आल्याने नाशिकचा चेहरा बदलेल, असा दावा त्यांनी केला.Raj Thackeray: ‘लाकुडतोड्या बरा होता…’; तपोवनातील वृक्षतोडीवरून राज ठाकरेंचा मंत्री महाजनांना टोला

तपोवन वृक्षतोडीवरून निशाणा

नाशिकच्या तपोवनातील वृक्षतोडीचा मुद्दा उद्धव ठाकरे यांनी अत्यंत आक्रमकपणे मांडला. भाजपवर टीका करताना ते म्हणाले, “भाजपाचे हिंदुत्व हे केवळ ‘चुनावी हिंदुत्व’ आहे. एकीकडे राम मंदिराचा डंका पिटता आणि दुसरीकडे प्रभू रामचंद्र जिथे तपस्येला बसले होते, त्या तपोवनातील झाडे कापण्याचा उद्योग करता.

उद्या प्रभू रामचंद्र कुठे तपस्येला बसले होते असे विचारले, तर काय इथले ‘नमो भवन’ दाखवणार का?” भाजप धर्माची पट्टी लावून लोकांना अंधभक्त बनवत असल्याचा आरोपही त्यांनी केला.

‘भाजपा हा उपटसुभांचा आणि कुत्ता-बिल्लींचा पक्ष’

माजी नेते सुधाकर बडगुजर आणि दिनकर पाटील यांच्या भाजप प्रवेशावर उद्धव ठाकरेंनी जोरदार फटकेबाजी केली. “भाजपा आता उपटसुभांचा पक्ष झाला आहे. कालपर्यंत ज्यांच्यावर तुम्ही गंभीर आरोप केले, ‘सलीम कुत्ता’चे साथीदार म्हटले, त्यांनाच आता पक्षात घेताय? पक्ष वाढवण्यासाठी तुम्हाला कुत्ता, बिल्ली सर्व चालते,” असा टोला त्यांनी लगावला.