घरातून निघले अन् बेपत्ता झाले

शुक्रवारी, २ जानेवारी रोजी सकाळी साडेनऊच्या सुमारास परेश हटकर आपल्या ‘वेरना’ कारने (MH-12 HM-0025) घरातून बाहेर पडले. रात्री उशिरापर्यंत ते घरी न परतल्याने आणि फोनला प्रतिसाद मिळत नसल्याने कुटुंबीयांची धाकधूक वाढली. अखेर त्यांची पत्नी वृषाली हटकर यांनी चतुःश्रृंगी पोलीस ठाण्यात धाव घेत तक्रार दाखल केली. पोलिसांनी तातडीने तपासाची चक्रे फिरवली आणि मोबाईल लोकेशन ट्रेस केले.

मोबाईल लोकेशनने उलगडलं गूढ

परेश यांचे लोकेशन लोणावळ्यातील टायगर पॉईंट परिसरात दाखवत होते. शनिवारी सकाळी लोणावळा ग्रामीण पोलिसांनी परिसरात शोध घेतला असता, त्यांची कार टायगर पॉईंटजवळ बेवारस स्थितीत उभी असलेली सापडली. कार सापडल्याने अनर्थ घडल्याचा संशय बळावला. लोणावळा ग्रामीण पोलीस आणि शिवदुर्ग मित्र आपत्कालीन पथकाने तातडीने दरीत शोधमोहीम हाती घेतली.

Gunratna Sadavarte: ठाकरेंचा जाहीरनामा आचारसंहितेचं उल्लंघन; गुणरत्न सदावर्तेंचा दावा, निवडणूक आयोगाकडे तक्रार करणार…

४५० फूट खोल दरीत थरार

अतिशय दुर्गम आणि खोल दरीत उतरून शिवदुर्गच्या पथकाने शोध सुरू केला. दुपारी दोन तासांच्या अथक परिश्रमानंतर सुमारे ४५० फूट खोल दरीत परेश यांचा मृतदेह आढळून आला. दोरखंडांच्या साहाय्याने हा मृतदेह बाहेर काढण्यात आला.

अपघात की घातपात? पोलीस चक्रावले

परेश हटकर टायगर पॉईंटवर का गेले? त्यांनी स्वतः दरीत उडी घेतली की त्यांचा पाय घसरला? किंवा यामागे काही घातपात आहे का? असे अनेक प्रश्न आता उपस्थित होत आहेत. टायगर पॉईंटसारख्या गर्दीच्या ठिकाणी अशी घटना घडल्याने पर्यटकांच्या सुरक्षेचा प्रश्न पुन्हा ऐरणीवर आला आहे.

सध्या लोणावळा ग्रामीण आणि चतुःश्रृंगी पोलीस या प्रकरणाचा संयुक्त तपास करत आहेत.