असा रचला पोलिसांनी सापळा

जिल्ह्यात बेकायदा पिस्तूल आणि गावठी कट्टे घेऊन फिरणाऱ्या गुन्हेगारांवर वचक बसवण्यासाठी एलसीबीचे पोलीस निरीक्षक संजीव झाडे यांनी सहायक निरीक्षक जयदीप कळेकर यांचे विशेष पथक तयार केले होते. हे पथक संशयितांच्या मागावर असतानाच, पथकातील संकेत कानडे आणि अभिजित माळकर यांना एक ‘हॉट’ टिप मिळाली. रेकॉर्डवरील आणि हद्दपार असलेला गुन्हेगार किरण लोखंडे हा अकुजनगर रस्त्यावर आपल्या साथीदारांसह शस्त्रे घेऊन उभा असल्याची माहिती खबऱ्याद्वारे मिळाली.

भररस्त्यात झडती आणि अटक

मिळालेल्या माहितीनुसार, एलसीबीच्या पथकाने तातडीने अकुजनगर ते वारणाली रस्त्यावर धाव घेत तिघांना वेढा घातला. पोलिसांनी किरण शंकर लोखंडे (वय २४, रा. कुपवाड), अभिजीत अरुण राणे (वय ३२, रा. सांगली) आणि तुषार नागेश माने (वय ३०, रा. कुपवाड रोड) यांना ताब्यात घेतले. त्यांची अंगझडती घेतली असता पोलिसांचेही डोळे विस्फारले; त्यांच्याकडे तब्बल ६ पिस्तूलं आणि ३ काडतुसं सापडली. पोलिसांनी ही सर्व शस्त्रे आणि त्यांची दुचाकी (MH-10 AV-1827) जप्त केली आहे.

Nashik Accident: त्र्यंबकेश्वरमधल्या ‘त्या’ अपघाताचा काळजाचा ठोका चुकवणारा व्हिडिओ व्हायरल; डंपरखाली चिरडून दोन तरुणांचा करुण अंत

मध्यप्रदेश कनेक्शन उघड

या तपासात मध्यप्रदेशातील ‘पाजी’ (पूर्ण नाव माहित नाही, रा. उमराटी) नावाच्या व्यक्तीचे नाव समोर आले असून तो सध्या पसार आहे. अटकेतील आरोपींना पुढील कारवाईसाठी संजयनगर पोलिसांच्या ताब्यात देण्यात आले आहे.

पोलीस निरीक्षक संजीव झाडे यांच्या मार्गदर्शनाखाली जयदीप कळेकर, संदीप पाटील, अतुल माने, संकेत कानडे आणि सायबर शाखेच्या पथकाने ही धडाकेबाज कारवाई पूर्ण केली. या कारवाईमुळे सांगलीतील गुन्हेगारांचे धाबे दणाणले आहेत.