प्रभाग १६ मध्ये राष्ट्रवादी काँग्रेस (शरदचंद्र पवार गट) आणि एमआयएम (MIM) या दोन्ही पक्षांनी शड्डू ठोकला होता. दोन्ही उमेदवारांची ताकद तोडीस तोड असल्याने ‘काटे की टक्कर’ निश्चित होती. मात्र, या लढतीत मुस्लिम मतांचे विभाजन होऊन तिसऱ्याचाच फायदा होईल, अशी भीती समाजधुरीणांना वाटू लागली. मग काय? ‘एकता’ टिकवण्यासाठी ज्येष्ठ नागरिकांनी मैदानात उडी घेतली आणि दोन्ही पक्षांना एकाच टेबलावर आणले.
अन् निघाली ती ‘जादुई’ चिठ्ठी.

बैठकीत चर्चा झाली, खलबतं झाली, पण माघार कुणी घ्यायची? हा प्रश्न सुटता सुटेना. अखेर लोकशाहीच्या या लढाईत ‘दैवाचा’ कौल घेण्याचं ठरलं. एका डब्यात दोन चिठ्ठ्या टाकल्या गेल्या. संपूर्ण प्रभागाचे श्वास रोखले गेले होते. जेव्हा चिठ्ठी उघडली, तेव्हा त्यावर राष्ट्रवादी काँग्रेस (शरदचंद्र पवार गट) या उमेदवाराचे नाव झळकले.

Jalgaon Election: जळगावात भाजपच्या आदेशाची ऐशी-तैशी! निष्ठावंत वाऱ्यावर, आमदारांच्या पुत्राची थेट बिनविरोध निवड

हारूनही जिंकलं एमआयएम

ईश्वर चिठ्ठीचा कौल येताच, एमआयएमच्या उमेदवाराने कोणताही आढेवेढा न घेता शब्दाला जागत आपला अर्ज मागे घेतला. अकोल्याच्या राजकीय इतिहासात ‘चिठ्ठी’ काढून उमेदवारीचा फैसला होण्याची ही पहिलीच वेळ असावी.

दरम्यान, सध्या अकोला महापालिकेच्या गल्लोगल्लीत या ‘इश्वर चिठ्ठी’चीच चर्चा सुरु आहे. उमेदवाराने माघार घेतली असली तरी, समाजहितासाठी घेतलेला हा निर्णय म्हणजे एकीचा विजय आहे, अशी भावना नागरिक व्यक्त करत आहेत.

आता या चिठ्ठीचा चमत्कार मतपेटीत काय जादू करतो, हे पाहणे औत्सुक्याचे ठरणार आहे.