मुंबई : मुंबई महापालिका निवडणुकीसाठी अखेरच्या क्षणापर्यंत उमेदवारांची अधिकृत यादी जाहीर करण्याचे राजकीय पक्षांनी त्यातही प्रामुख्याने भाजप, शिवसेना, शिवसेना (उबाठा) आणि मनसे यांनी टाळले. मात्र, इच्छुक उमेदवारांना सोमवारी याची कुणकुण लागल्याने दिवसभर राजकीय पक्षांमंध्ये नाराजी, बंडखोरी आणि इशारे-प्रतिइशाऱ्यांना उधाण आले होते. काही उमेदवारांनी जाहीर पत्र लिहून नाराजीला वाट करून दिली तर काहींनी थेट आत्मदहनाचा इशारा दिला. दरम्यान, मुंबई महापालिकेसाठी भाजप-शिवसेनेचे जागावाटप अंतिम झाले असून भाजप १३७ तर शिवसेना ९० जागांवर लढणार आहे.

तब्बल आठ वर्षांनी होत असलेल्या मुंबई महापालिका निवडणुकीसाठी सर्वच पक्षांमध्ये इच्छुकांची संख्या प्रचंड प्रमाणात आहे. त्यामुळे बंडखोरांना थोपविण्यासाठी राजकीय पक्षांनी शेवटच्या क्षणापर्यंत अधिकृत उमेदवारांची यादी जाहीर न करता मागच्या दाराने उमेदवारांना एबी फॉर्म देण्याची खेळी खेळली आहे. साहजिकच अर्ज दाखल करायचा दिवस उजाडत आला तरी आपल्याला उमेदवारी मिळणार की नाही याचा उमेदवारांना थांगपत्ता नव्हता. मात्र, रविवारी मध्यरात्रीपासून अनेक पक्षांनी उमेदवारांना गुपचूप बोलावून एबी फॉर्मचे वाटप सुरू केल्याने सोमवारी नाराजांनी बंडखोरीचे अस्त्र परजायला सुरुवात केली.
BMC Election : मुंबईत शिवसेना-भाजपचा जागावाटपाचा फॉर्म्युला ठरला, कोण किती जागा लढणार? पाहा फायनल आकडा
शिवसेना (उबाठा) :
पक्षाचे प्रमुख उद्धव ठाकरे यांच्या मातोश्री या निवासस्थानी नाराजांनी आपल्या समर्थकांसह गर्दी केली. वॉर्ड क्रमांक ५९मध्ये उबाठाने शैलश फणसे यांना उमेदवारी जाहीर केल्याने कातावलेल्या सचिन शिवेकर यांनी अपक्ष लढण्याची तयारी सुरू केली.

मनसे :
राज ठाकरे यांनी शिवतीर्थ या निवासस्थानाबाहेरही अनेक इच्छुक ठिय्या मांडून होते. बहुसंख्य प्रभाग शिवसेना उबाठाकडे गेल्याने नाराजी व्यक्त करण्यासाठीही अनेकांनी राज यांच्या निवासस्थानी गर्दी केली होती.

शिवसेना :
शिवसेनेच्या अनेक नाराज कार्यकर्त्यांनी उपमुख्यमंत्री एकनाथ शिंदे यांचे नंदनवन हे शासकीय निवासस्थान गाठले. प्रभाग क्रमांक १९६ भाजपकडे गेल्याने तीन बस भरून कार्यकर्ते शिंदे यांच्या निवासस्थानी जमले होते.

भाजप :
काही नाराजांनी थेट पक्षाच्या प्रमुखांना जाहीर पत्र लिहिले आहे. कोल्हापूरच्या भाजप महानगर चिटणीस धनश्री तोडकर यांनी थेट पक्ष कार्यालयासमोर आत्मदहनाचा इशारा दिला.
भाजपचा सेफ बालेकिल्ला सोडून मशाल हाती; मोठी रिस्क घेतली, झटपट उमेदवारी मिळवणाऱ्या आसावरी पाटील कोण?
६० माजी नगरसेवकाना संधी
एकनाथ शिंदे यांच्या शिवसेनेने अनेक उमेदवारांना एबी फॉर्मचे वाटप केले. ठाकरे यांच्या शिवसेनेतून आलेल्या ३९ आणि इतर पक्षातून आलेल्या २१ अशा एकूण ६० माजी नगरसेवकांना शिवसेनेने उमेदवारी दिली आहे.

पश्चिम मुंबईबाबत बैठक
पश्चिम मुंबईतील जागांबाबत शिंदे यांच्या निवासस्थानी महत्त्वाची बैठक झाली. दुसरीकडे महायुतीच्या नेत्यांनी आधी एकनाथ शिंदे यांची तर नंतर मुख्यमंत्री देवेंद्र फडणवीसांची भेट घेतली. प्रवीण दरेकर, अतुल भातखळकर यांनी एकनाथ शिंदे यांची भेट घेतली तर आशिष शेलार, अमित साटम, उदय सामंत, राहुल शेवाळे यांनी मुख्यमंत्री देवेंद्र फडणवीसांची वर्षा बंगल्यावर भेट घेऊन वादग्रस्त जागांवर चर्चा केली.
BMC Election: काँग्रेसची 87 उमेदवारांची पहिली यादी जाहीर, तुमच्या वॉर्डात कोणाला संधी, पाहा संपूर्ण यादी
कुठे जुळले, कुठे तुटले ?
-ठाणे : भाजप-शिवसेना युती. मात्र, जागावाटप झालेले नाही.
-कल्याण-डोंबिवली, नवी मुंबई, मिरा-भाईंदर, भिवंडी : महायुतीच. पण जागावाटप झालेले नाही.
-नवी मुंबई : महाविकास आघाडी एकत्र
-मिरा-भाईंदर मविआमध्ये मनसेला घेण्याची तयारी सुरू.
-भिवंडी : काँग्रेस स्वबळावर
-वसई-विरार : बविआ, काँग्रेस आणि मनसे एकत्र. शिवसेना-भाजपची युती
-उल्हासनगर : भाजप स्वबळावर. शिवसेनेची टीम ओमी कलानीशी युती
-नाशिक: भाजप स्वबळावर

महाविकास आघाडी फुटली
भाजपला सत्तेपासून दूर ठेवण्यासाठी निर्माण झालेली महाविकास आघाडी फुटली आहे. मुंबई महापालिकेसह अनेक ठिकाणी काँग्रेस, शिवसेना (उबाठा) आणि राष्ट्रवादी काँग्रेस (शप) या पक्षांनी वेगवेगळ्या पक्षांशी आघाडी करण्याचा निर्णय घेतला आहे.

लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा