सोमवारी (29 डिसेंबर) भाजपकडून अनेक प्रभागांमध्ये उमेदवारी अर्जांचे फॉर्म वाटप करण्यात आले आहेत. मात्र, उमेदवारांची अधिकृत घोषणा न करता, काही निवडक उमेदवारांना अत्यंत गोपनीय पद्धतीने तयारी करण्याच्या सूचना देण्यात आल्याची माहिती समोर आली आहे. प्रत्येक प्रभागात एकापेक्षा अधिक इच्छुक उमेदवारांना तयारीत राहण्यास सांगण्यात आले होते. त्यामुळे शेवटपर्यंत कोणाला अधिकृत उमेदवारी मिळणार, याबाबत संभ्रम कायम होता.
Nagpur Elections: फडणवीस-गडकरींच्या ‘होमटाऊन’मध्ये चौथ्या विजयासाठी भाजप सज्ज; तर पुनरुज्जीवनाच्या आशेने काँग्रेस मैदानात
भाजपच्या निवडणूक प्रक्रियेनुसार, उमेदवारी अर्ज दाखल करण्यासाठी ‘ए’ आणि ‘बी’ हे दोन्ही फॉर्म आवश्यक असतात. सध्या अनेक प्रभागांमध्ये इच्छुक उमेदवारांना केवळ ‘ए’ फॉर्म देण्यात आला आहे. तर, मंगळवारी (30 डिसेंबर) उमेदवारी अर्ज दाखल करण्याचा शेवटचा दिवस असल्याने, ज्यांना अधिकृत उमेदवार म्हणून निवडण्यात आले आहे, त्यांनाच शेवटच्या क्षणी ‘बी’ फॉर्म देण्यात येणार असल्याचे बोलले जात आहे.

हे ‘बी’ फॉर्मही अत्यंत गुप्तपणे देऊन, तत्काळ नामांकन अर्ज दाखल करण्याच्या सूचना उमेदवारांना दिल्या जाणार आहेत. सोमवारी जवळपास 50 च्या वर उमेदवारांना ‘बी’ फॉर्म चे वाटप करण्यात आले आहे.

भाजपकडून तरुण चेहऱ्यांना संधी

भारतीय जनता पक्षाने अवघ्या 45 वर्षीय नितीन नबीन यांना राष्ट्रीय अध्यक्ष करून पक्षात मोठा खांदेबदल केला आहे. त्यामुळे यंदा महानगरपालिकेच्या निवडणुकांमध्ये पक्ष तरुणांना संधी देणार असून दिग्गज माजी नगरसेवकांना नारळ देणार असल्याचे संकेत प्राप्त होत आहेत.

महानगरपालिका निवडणुकांसाठी अर्ज भरण्याकरिता आता केवळ 48 तास शिल्लक असून अद्यापही भाजपने अधिकृत उमेदवारांची नावे जाहीर केलेली नाहीत. पक्षांतर्गत बंडखोरी टाळण्यासाठी यादी अगदी वेळेवरच येणार असल्याचे समजते. आज निवडणुकींसदर्भात झालेल्या बैठकी दरम्यान मुख्यमंत्री देवेंद्र फडणवीस , केंद्रीय मंत्री नितीन गडकरी आणि पालकमंत्री चंद्रशेखर बावनकुळे यांच्या उपस्थितीत उमेदवारीवर खल झाला. यावेळी नव्या चेहऱ्यांना संधी देण्याचा मुद्दा चर्चेला आल्याचे कळते. यावेळी अनेक दिग्गज माजी नगरसेवकांच्या नावांवरही खल झाला. त्यात यंदा दिग्गजांना नारळ देण्याचे संकेत मिळत आहेत. त्यातच अद्याप उमेदवारांची यादी जाहीर न झाल्याने इच्छूकांमध्ये विशेषत: दिग्गजांमधील अस्वस्थता वाढली असून प्रत्येकच जण आपआपल्या स्तरावर फिल्डिंग लावत आहे.