पुण्यातील लोकप्रतिनिधींकडून आपल्या मुलांना, घरातील व्यक्तींना आगामी महापालिका निवडणुकीत उमेदवारी मागण्यात येत असल्याचे वृत्त ‘महाराष्ट्र टाइम्स’ने रविवारी प्रकाशित केले होते. भाजपमध्ये या उमेदवारीवरून खदखद व्यक्त होत होती. मुख्यमंत्री फडणवीस तसेच राष्ट्रीय सहसंघटन सरचिटणीस शिवप्रकाश यांच्या उपस्थितीत मुंबई येथे झालेल्या कोअर कमिटीच्या बैठकीत उमेदवारीबाबत पडसाद उमटले होते. या बैठकांनंतर अवघ्या ४८ तासांत वाढत्या घराणेशाहीला थांबविण्याचा निर्णय घेण्यात आला आहे.

‘इतर पक्षाच्या पार्श्वभूमीचा लाभ’
खडकवासला विधानसभा मतदारसंघाचे आमदार भीमराव तापकीर यांना त्यांचे पुतणे अभिषेक यांच्यासाठी उमेदवारी हवी आहे. पक्षाच्या या निर्णयामुळे त्यांच्या संभाव्य उमेदवारीवर गंडांतर येण्याची दाट शक्यता आहे. तापकीर यांच्या भावजय माजी नगरसेविका वर्षा या निवडणुकीच्या रिंगणात असणार आहेत. वर्षा तापकीर या महापालिकेवर तीनदा निवडून गेल्या असून यंदा चौथ्यांदा त्या निवडणुकीच्या रिंगणात असतील. महापालिकेत त्यांनाही कुठलेही लाभाचे पद मिळालेले नाही. वडगाव शेरी विधानसभा मतदारसंघातील राष्ट्रवादी काँग्रेस शरदचंद्र पवार पक्षाचे आमदार बापू पठारे यांचे चिरंजीव सुरेंद्र हे भाजपवासी झाले असून त्यांनाही उमेदवारी देण्यात येणार आहे. बापू पठारे हे ‘राष्ट्रवादी’मध्ये असल्याने सुरेंद्र यांना उमेदवारी मिळणार असल्याचे सांगण्यात येत आहे.
Pune News : दादा म्हणाले, ‘परिवार पुन्हा एकत्र येत आहेत’, दोन्ही राष्ट्रवादी सोबत लढणार, अजित पवारांची मोठी घोषणा
बापट, टिळकांच्या
घरात उमेदवारी?
खासदार मोहोळ यांचे चूलत बंधू श्रीधर मोहोळ यांच्या कुटुंबात उमेदवारी देण्याचे घाटत आहे. त्यांना ज्या प्रभागात उमेदवारी देण्यात येणार आहे, तेथे तुल्यबळ उमेदवार नसल्याने त्यांना उमेदवारी मिळू शकते, असा दावा करण्यात येत आहे. दरम्यान, पिंपरी-चिंचवड येथील भाजपच्या लोकप्रतिनिधींच्या घरातील उमेदवारी थांबविण्याचा निर्णय घेण्यात आल्याचे समजते. दरम्यान, माजी खासदार दिवंगत नेते गिरीश बापट तसेच माजी आमदार दिवंगत नेत्या मुक्ता टिळक यांच्या कुटुंबात या निवडणुकीत उमेदवारी देण्यात येणार असल्याचे समजते.कुणाला खंत, कुठे नाराजी
राज्याचे नगरविकास राज्यमंत्री मिसाळ यांची भावजय माजी नगरसेविका मानसी देशपांडे तसेच, मिसाळ यांचे चिरंजीव करण यांची उमेदवारी निश्चित झाल्याची चर्चा होती. देशपांडे या तीन वेळा महापालिकेच्या नगरसेविका म्हणून निवडून गेल्या आहेत. केवळ आमदारांचे जवळचे नातेवाईक असल्याने त्यांना लाभाचे पद मिळू शकले नसल्याची त्यांची खंत आहे. भाजपकडून करण यांची उमेदवारी नाकारण्याची शक्यता आहे. मात्र, देशपांडे यांना उमेदवारी मिळेल, असा दावा करण्यात येत आहे. आमदार सुनील कांबळे यांची कन्या सुप्रिया यांचीही उमेदवारी नाकारण्यात येणार असल्याचे समजते.