राज्य सरकारने १२ ज्योतिर्लिंगांपैकी एक असलेल्या श्री क्षेत्र भीमाशंकर मंदिराच्या सर्वांगीण विकासासाठी विशेष विकास आराखड्याला मंजुरी दिली आहे. आराखड्यातील प्रत्यक्ष बांधकामाच्या काळातील सुरक्षितता लक्षात घेता, २३ डिसेंबरला जिल्हा प्रशासन, श्री क्षेत्र भीमाशंकर देवस्थान संस्थानचे विश्वस्त, स्थानिक विक्रेते; तसेच स्थानिक ग्रामस्थांची संयुक्त बैठक झाली. त्यात सर्वांच्या सहमतीने नऊ जानेवारीपासून पुढे तीन महिन्यांसाठी मंदिर बंद ठेवण्याचा निर्णय घेण्यात आला. दरम्यान, महाशिवरात्रीच्या १२ ते १८ फेब्रुवारीला भाविकांसाठी मंदीर खुले राहणार आहे.

Pune Metro Update: पुणेकरांची प्रतीक्षा वाढणार! हिंजवडी-शिवाजीनगर मेट्रोला मार्चची डेडलाईन दिली पण… मोठी अपडेट समोर

‘सन २०२७मध्ये त्र्यंबकेश्वर (नाशिक) येथे सिंहस्थ कुंभमेळा होणार आहे. प्रयागराज येथे झालेल्या महाकुंभच्या अनुभवावरून कुंभमेळ्याच्या काळात नाशिक-त्र्यंबकेश्वर येथे येणाऱ्या लाखो भाविकांची भीमाशंकर येथे दर्शनासाठी गर्दी होण्याची शक्यता आहे. कुंभमेळ्यापूर्वी आवश्यक पायाभूत सुविधा, सभामंडप, सुरक्षित प्रवेश-निर्गमन व्यवस्था; तसेच गर्दी नियंत्रणाची कामे वेळेत पूर्ण करण्याच्या सूचना सरकारने दिल्या आहेत. त्यानुसार कामाचे स्वरूप आणि व्याप्ती लक्षात घेता, भाविकांच्या सुरक्षिततेसाठा कामे कालमर्यादेत पूर्ण करणे आवश्यक असून, मंदिर परिसर भाविकांसाठी तात्पुरता बंद करण्यात येणार आहे,’ असे जिल्हाधिकारी डुडी यांनी स्पष्ट केले.

नित्यपूजा सुरूच राहणार

मंदिर दर्शनासाठी बंद असले, तरी मंदिरातील नित्यपूजा-अर्चा, अभिषेक, धार्मिक विधी परंपरेनुसार वेळेत सुरू राहणार आहेत. मंदिर बंद असल्याने मंदिर परिसरात प्रवेश अथवा दर्शनसेवा उपलब्ध राहणार नाही. बांधकाम यंत्रणा, अधिकृत अधिकारी कर्मचारी; तसेच भीमाशंकर ग्रामस्थ वगळता कोणालाही श्री क्षेत्र भीमाशंकर परिसरात प्रवेश दिला जाणार नाही, असे जिल्हा प्रशासनाने स्पष्ट केले.