नाशिक: मुंबईत भाजप व शिंदे गटामध्ये झालेल्या जागावाटपात नाशिकमध्ये भाजप ८०, शिंदे सेना ३५, तर राष्ट्रवादी अजित पवार गटाला सहा जागा सोडण्याचा फॉर्म्युला निश्चित झाल्याची माहिती सूत्रांनी दिली. दुसरीकडे महायुती झाल्यास आपले काय होणार, या शक्यतेने इच्छुक सैरभैर झाले आहेत. दरम्यान, महायुती झाल्यास संभाव्य बंडखोरांवर महाविकास आघाडीकडूनही नजर ठेवली जात आहे.
नाशिक महापालिका निवडणुकांसाठी मंगळवारपासून (दि. २३) अर्ज भरण्यास प्रारंभ झाला असतानाही महायुतीच्या जागावाटपाचा तिढा सुटत नसल्याचे चित्र आहे. शिंदे सेनेने १२२ जागांमध्ये ४५ जागांचा हट्ट कायम ठेवला आहे, तर राष्ट्रवादी काँग्रेस ३० जागांवर अडून बसली आहे. त्यामुळे नाशिकमधील जागावाटपाचे सूत्र भाजप, शिवसेना आणि राष्ट्रवादी या तिन्ही पक्षांमध्ये जमत नसल्याचे चित्र आहे. त्यामुळे भाजपने शिंदे सेना आणि राष्ट्रवादीसोबतच्या चर्चा थांबवल्या होत्या. दुसरीकडे भाजपने आता २०१७ च्या पॅटर्ननुसार स्वबळाची तयारी सुरू ठेवत, अन्य पक्षांतील दिग्गजांसाठी पक्षाची दारे उघडी ठेवली आहे. स्थानिक पातळीवर चर्चा थांबल्या असल्या तरी मुंबईत वरिष्ठांमध्ये मुंबई आणि नाशिकबाबत चर्चा सुरू आहे. त्यात नाशिकमधील जागावाटपाचाही फॉर्म्युला ठरल्याचे समजते. त्यात भाजपला सर्वाधिक ८० जागा, त्याखालोखाल शिवसेनेला ३५, तर राष्ट्रवादी काँग्रेसला सहा आणि रिपब्लिकन पक्षाला १ जागा सोडल्याचे बोलले जात आहे. त्यामुळे भाजप आणि शिंदे सेनेकडून इच्छुकांच्या पोटात गोळा उठला आहे.
Nashik Politics: ‘मनसे’चे जहाज आता कॅप्टनविना! दिनकर पाटलांकडून युतीचा जल्लोष, नंतर भाजपात प्रवेश
बंडखोरांवर मविआची नजर
भाजपकडून निवडणुकीसाठी १,०७७, तर शिंदे सेनेकडून निवडणूक लढण्यासाठी पाचशेपेक्षा अधिक इच्छुक आहेत. त्यामुळे महायुती झाल्यास जागांचे वाटप होऊन कमी जागा मिळणार असल्याने महायुतीकडून इच्छुक असलेल्यांचा हिरमोड होण्याची शक्यता आहे. त्यामुळे महायुतीकडून ज्यांना उमेदवारी मिळणार नाही, त्यांच्यावर आता महाविकास आघाडीतल्या घटक पक्षांकडून नजर ठेवली जात आहे. प्रबळ आणि निवडून येण्याची शक्यता असलेल्यांना हेरून त्यांच्यावर आतापासूनच जाळे टाकले जात असल्याचे चित्र आहे.
सर्वच पक्षांचे ‘आस्ते कदम’
मुंबई : विलंबाने होत असलेल्या महापालिका निवडणुकांच्या उमेदवारीसाठी इच्छुकांची भाऊगर्दी वाढली असून, बंडखोरांना चकवा देण्याबरोबरच फोडाफोडी रोखण्यासाठी सर्वच पक्षांनी सावधगिरीचा पवित्रा घेतला आहे. मुंबईत ठाकरे बंधूंनी युती जाहीर करूनही जागावाटपाचे सूत्र गुलदस्त्याच ठेवले, तर भाजप-शिवसेनेने गेल्या वेळी निवडून आलेल्या नगरसेवकांच्या जागा वगळता वादग्रस्त जागांवर चर्चेचे गुऱ्हाळ सुरूच ठेवत महायुती जाहीर न करण्याची चलाखी केली. काँग्रेस आणि दोन्ही राष्टवादी काँग्रेसनेही अधिकृत उमेदवारांची घोषणा लांबणीवर टाकण्याची भूमिका घेतली आहे.
Nashik News : निष्ठावंतांची नाराजी विकोपाला, आयारामांवरून भाजपमध्ये ‘सिव्हील वॉर’; संकटमोचक महाजनांसमोर नाशकात काय घडलं?
मुंबईत आमदारांची उमेदवार यादीवर चर्चा
महायुतीच्या जागावाटपाचा घोळ सुरू असताना दुसरीकडे भाजपने नाशिकसाठी उमेदवार निश्चितीची प्रक्रिया सुरू केली आहे. शहरातील भाजपच्या तिन्ही आमदारांनी मुंबई गाठत, संभाव्य उमेदवारांच्या नावावर चर्चा सुरू केली आहे. आमदारांनी दिलेल्या पंसतिक्रमांवर आता वरिष्ठांकडून चर्चा केली जाणार आहे.
Nashik BJP: आयारामांवरुन भाजपमध्ये यादवी; खैरे, पांडे, वाघ यांना पोलिस बंदोबस्तात प्रवेश देण्याची वेळ
‘जागावाटप पूर्ण, घोषणा बाकी’
मुंबई : मुंबई, ठाण्यासह प्रमुख महापालिकांमध्ये भाजप आणि शिवसेना यांच्यात जागावाटपावरून रस्सीखेच सुरू असल्याच्या चर्चेला मुख्यमंत्री देवेंद्र फडणवीस यांनी शुक्रवारी पूर्णविराम दिला. ‘आमचे नीट चालले आहे, आमची युती आहेच. आता फक्त जागावाटप घोषित करायचे बाकी आहे’, अशी माहिती त्यांनी शुक्रवारी प्रसारमाध्यमांच्या प्रतिनिधींशी बोलताना दिली. सायन येथे वीर बाल दिनानिमित्त आयोजित कार्यक्रमानंतर बोलताना फडणवीस यांनी जागावाटपावर भाष्य केले.
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा