राष्ट्रवादी काँग्रेसकडून राज्यातील महानगरपालिका निवडणुकांसाठी ४० स्टार प्रचारकांची यादी गुरुवारी जाहीर करण्यात आली. महायुतीत स्थान नाकारण्यासाठी भाजपकडून ज्या नवाब मलिक यांचे नाव पुढे करण्यात येत आहे, त्यांचा समावेश पक्षाने प्रचारकांच्या यादीत केला आहे. तर, हत्येच्या आरोपींशी संबंध असल्याने मंत्रिपदाचा राजीनामा द्यावा लागलेल्या धनंजय मुंडे यांच्यावरही प्रचाराची जबाबदारी देण्यात आली आहे.

ठाकरे बंधूंची युती, जागा जिंकणार किती? आश्चर्यजनक आकडे समोर; महायुतीला ‘परफेक्ट’ जागांचा अंदाज
राज्यातील कोणत्या पालिकेत कोणासोबत लढावे याविषयीचा निर्णय अद्याप राष्ट्रवादी काँग्रेसकडून जाहीर करण्यात आलेला नाही. अजूनही पक्षाकडून पर्यायांची चाचपणी करण्यात येत आहे. त्यातच गुरुवारी ४० स्टार प्रचारकांची यादी जाहीर केली.

सना मलिक पण स्टार प्रचारक
भाजपकडून मलिक यांच्या नावाला विरोध आहे. मलिक यांच्या नेतृ्त्वात मुंबईत राष्ट्रवादी निवडणूक लढवत असल्याने त्यांना महायुतीत जागा नाकारल्याचे कारण भाजपकडून पुढे केले जात आहे. राष्ट्रवादीने याला न जुमानता स्टार प्रचारकांच्या यादीत मलिक यांचा समावेश केला आहे. त्याचबरोबर त्यांच्या कन्या आमदार सना मलिक यांचाही समावेश करण्यात आला आहे. प्रकृती अस्वास्थ्यामुळे छगन भुजबळ प्रचारात उतरणार नाहीत. विधान परिषदेचे आमदार पंकज भुजबळांचाही समावेश यादीत नसून मुख्य प्रवक्ते आनंद परांजपे यांनाही या यादीत स्थान नाही.

यांच्यावर जबाबदारी
उपमुख्यमंत्री अजित पवार, पक्षाचे कार्याध्यक्ष प्रफुल पटेल, प्रदेशाध्यक्ष सुनील तटकरे यांच्या खांद्यावर पक्षाच्या प्रचाराची धुरा असेल. त्याच बरोबरीने विधानसभा उपाध्यक्ष अण्णा बनसोडे, राज्य मंत्रिमंडळातील नरहरी झिरवाळ, बाबासाहेब पाटील, मकरंद जाधव-पाटील, दत्तात्रय भरणे, अदिती तटकरे, इंद्रनील नाईक यांचाही प्रचारकांच्या यादीत समावेश आहे