भाजपची काल रात्री उशिरा एक महत्त्वाची बैठक पार पडली. या बैठकीत भाजपच्या पहिल्या यादीवर अंतिम चर्चा करण्यात आली आहे. या बैठकीनंतर पुण्याचे खासदार आणि केंद्रीय राज्यमंत्री मुरलीधर मोहोळ यांनी प्रतिक्रिया दिली. मात्र मोहोळ यांच्या या प्रतिक्रियेनंतर पुण्यात दादा विरुद्ध अण्णा असा नवा वाद रंगण्याची शक्यता आहे.

पुणे महानगरपालिका निवडणुकीसाठी दोन्ही राष्ट्रवादीच्या युतीच्या चर्चा सुरु आहेत. यावर मुरलीधर मोहोळ यांना प्रश्न विचारला असता ते म्हणाले, ‘भाजपच्या विरोधात सगळे एकत्र येत आहेत. दोन राष्ट्रवादी एकत्र येत असल्या तर त्यांना शुभेच्छा आहेत. पण पुणेकरांनी भाजपला भक्कम साथ आहे. गेल्या 3 निवडणुकीत आम्हाला पुणेकरांनी साथ दिली. तसंच वातावरण यावेळेस सुद्धा दिसतंय आणि म्हणून काय करायचं तर सगळे एकत्र लढू असं समोरच्यांचं ठरलेलं दिसतंय. याचा अर्थ असा की पैलवान मजबूत ताकदवान आहे म्हणून सगळे छोटे छोटे पैलवान एकत्र येत आहेत.’ मुरलीधर मोहोळ यांच्या या प्रतिक्रियेतून त्यांनी अजित पवारांसह इतर पक्षातील नेत्यांना अप्रत्यक्षपणे त्यांनी छोट्या पैलवानांची उपमा दिल्यामुळे पुण्यात पुन्हा एकदा दादा विरुद्ध अण्णा अर्थात अजित पवार विरुद्ध मुरलीधर मोहोळ असा वाद पाहायला मिळू शकतो.

दरम्यान, एकीकडे केंद्रीय मंत्री अमित शहा यांच्या खात्यांचे राज्यमंत्री आणि दुसरीकडे मुख्यमंत्री देवेंद्र फडणवीस यांचे विश्वासू सहकारी असलेल्या मोहोळ यांचे शहरातील पारडे जड होऊ लागल्याचे पक्षात सांगण्यात येते. त्यातच त्यांनी पवार यांच्या राष्ट्रवादी काँग्रेसला तडे देण्याचा प्रयत्न सुरू केल्यानंतर ‘दादा विरुद्ध अण्णा’ या नव्या संघर्षाला सुरूवात झाल्याचे चित्र दिसू लागले आहे.