भाजपने एकीकडे मित्रपक्षांना जागावाटपात गुंतवून ठेवले असताना दुसरीकडे सावध झालेल्या शिंदेसेनेनेही आता स्वबळाची तयारी सुरू केली आहे. स्वबळावर निवडणूक लढविण्याच्या अनुषंगाने पॅनल भक्कम करण्याची तयारी सुरू झाली आहे. त्यासाठी अन्य पक्षांतील माजी नगरसेवकांना गळाला लावले जात आहे.
Girish Mahajan: ‘लव्ह, वॉर अन् इलेक्शनमध्ये सगळं माफ…!’; मंत्री गिरीश महाजनांची मित्रपक्षांना ‘गुगली’
काँग्रेसचे माजी नगरसेवक राहुल दिवे यांच्यासह आशा तडवी व माजी अपक्ष नगरसेवक सुनील बोराडे यांनी मुंबईत उपमुख्यमंत्री एकनाथ शिंदे यांच्या उपस्थितीत शिंदेसेनेत प्रवेश केला. शिक्षणमंत्री दादा भुसे, उपनेते अजय बोरस्ते, विजय करंजकर, महानगरप्रमुख प्रवीण तिदमे यांच्या उपस्थितीत प्रवेश पार पडला. शहरात काँग्रेसची ताकद ठराविक प्रभागांमध्ये आहे. त्यात प्रभाग क्रमांक १६ चा समावेश होतो. दिवे व तडवी यांचा शिंदेसेनेत प्रवेश झाल्याने काँग्रेसला मोठा झटका मानला जात आहे. काँग्रेसच्या मुलाखतीच्या दुसऱ्या दिवशीच त्यांनी पक्षाचा राजीनामा देऊन तिसऱ्या दिवशी शिंदेसेनेत प्रवेश केला.

5 मिनिटं वेळ द्या! NCPच्या हतबल नेत्यांची महाजनांकडे आर्जवं; मंत्री, आमदार कारपर्यंत आले, पण…
प्रभाग १६ मध्ये पॅनल भक्कम
दिवेंनी दोन दिवसांपूर्वी काँग्रेसचा पदाचा राजीनामा दिला. भाजपमध्ये दिवे यांना प्रवेश करायचा होता, मात्र स्थानिक नेत्यांनी विरोध केल्यानंतर त्यांचा प्रवेश थांबला. त्यामुळे दिवे जिकडे जातील तिकडे तडवी यांचाही प्रवेश निश्चित असल्याने दिवे यांच्याबरोबर तडवी यांचा बुधवारी प्रवेश सोहळा झाला. बोराडे हे सन २००७ मध्ये अपक्ष नगरसेवक म्हणून निवडून आले होते. त्यानंतर मात्र त्यांना फारसे यश मिळाले नाही. प्रभाग क्रमांक १६ मध्ये पॅनल भक्कम करण्याच्या अनुषंगाने बोराडे यांचा प्रवेश झाला.

काँग्रेसचे अस्तित्व धोक्यात
नाशिक शहरात काँग्रेसचे अस्तित्व मोजक्या चार ते पाच प्रभागांत आहे. त्यात प्रभाग १६ चाही समावेश होता. दोन नगरसेवक शिंदेसेनेत गेल्यामुळे काँग्रेसचे अस्तित्व धोक्यात आले आहे. महाविकास आघाडीत काँग्रेस समाविष्ट होत असताना ४५ जागांची मागणी करण्यात आली आहे. मात्र, दोन माजी नगरसेवकांनी शिवसेनेत प्रवेश केल्याने काँग्रेसची वाटाघाटींची ताकद कमी झाली आहे.