कल्याण आणि डोंबिवली हे दोन शहरं आहेत. सध्याच्या घडीला मुंबई शहर हे विस्तारलं जात आहे. या विस्तारणाऱ्या मुंबईच्या उपनगरीय भागात कल्याण डोंबिवली हे शहरं देखील महत्त्वाची आहेत. मुंबई महापालिका इतकीच इथली कल्याण डोंबिवली महापालिका देखील महत्त्वाची आहे. कारण या महापालिकेचं क्षेत्र देखील तितकं विस्तारलं गेलं आहे. या महापालिकेच्या हद्दीत लोकसंख्यादेखील तितकी मोठी आहे. त्यामुळे ही महापालिका प्रत्येक पक्षासाठी महत्त्वाची आहे.

कल्याण शहराला ऐतिहासिक महत्त्व आहे. छत्रपती शिवाजी महाराजांनी याच कल्याणच्या बंदरावर स्वराज्याचं पहिलं आरमार उभारलं आहे. शिवरायांच्या या इतिहासाची साक्ष देणारा दुर्गाडी किल्लादेखील इथे आहे. कल्याण हे शतको वर्षांपासूनचं व्यापाऱ्याचं अतिशय महत्त्वाचं बंदर राहिलेलं आहे. विशेष म्हणजे सातवाहन, शिलाहार, मराठा आणि ब्रिटिश काळात कल्याणचे व्यापारी महत्त्व कायम होते. तर डोंबिवली हे 1960 नंतर नियोजित वसाहत, औद्योगिक आणि मध्यमवर्गीय शहर म्हणून विकसित झाले.

कल्याण आणि डोंबिवली या दोन्ही शहरांना पूर्वी स्वतंत्र नगरपरिषद होत्या. पण वाढती लोकसंख्या, नागरी समस्या आणि शहरी विस्तार या गोष्टी लक्षात घेऊन 1 ऑक्टोबर 1983 रोजी कल्याण डोंबिवली या दोन्ही शहरांची कल्याण डोंबिवली महापालिकेची स्थापना करण्यात आली. तेव्हापासून या महापालिकेला महत्त्व आहे. ही शहरं मुंबईपासून जवळ असल्यामुळे केडीएमसी महापालिकेकडे महाराष्ट्रातील महत्त्वाच्या महापालिकांपैकी एक महत्त्वाची महापालिका म्हणून पाहिलं जातं.

कल्याण डोंबिवली महापालिकेवर सुरुवातीच्या काळात काँग्रेसचा प्रभाव होता. 1993 ते 90 च्या काळात इथे काँग्रेसची मजबूत ताकद होती. पण त्यानंतर शिवसेनेचा उदय झाला आणि राजकीय परिस्थिती हळूहळू बदलत गेली. 1990 ते 2005 पर्यंत भाजपची इथे अबाधित सत्ता राहिली. यानंतर 2010 मध्ये मनसे, राष्ट्रवादी काँग्रेस आणि काँग्रेस यांचा इथे प्रभाव बघायला मिळाला होता. त्यामुळे इथे त्रिशंकु परिस्थिती निर्माण झाली. 2015 च्या काळातही शिवसेना महापालिकेतला सर्वात मोठा पक्ष ठरला. इथे शिवसेना-भाजपची खमकी युती राहिली. पण नंतर परिस्थिती बदलत गेली. तसेच 2020 पासून इथे निवडणूक रखडलेली राहिली. अखेर आता महापालिका निवडणुका होत आहेत. यामध्ये कोणत्या पक्षाची ताकद जास्त असेल ते पाहणं महत्त्वाचं राहील.

विशेष म्हणजे सध्याच्या परिस्थितीत राजकारण फार वेगळ्या वळणावर आलेलं आहे. ठाकरे बंधू 18 वर्षांनी एकत्र आलेले आहेत. त्यांची कल्याण डोंबिवलीत युती झाली तर त्याचा किती परिणाम इथल्या स्थानिक राजकारणावर पडतो? ते पाहणं महत्त्वाचं आहे. तसेच भाजपची देखील इथे ताकद आहे. तर कल्याण लोकसभा मतदारसंघावर शिवसेना शिंदे गटाचा ताबा आहे. उपमुख्यमंत्री एकनाथ शिंदे यांचे चिरंजीव श्रीकांत शिंदे इथले खासदार आहेत. त्यामुळे शिंदे गटाचा देखील हा भाग बालेकिल्ला मानला जातोय. या सर्व परिस्थितीत काँग्रेस आणि राष्ट्रवादी काँग्रेस, वंचित बहुजन आघाडी, आरपीआयदेखील आपलं अस्तित्वा दाखवून देताना दिसणार आहेत. त्यामुळे ही निवडणूक फार चुरशीची ठरणार आहे. या निवडणुकीत कुणाची सरशी होईल आणि महापौर कोणत्या पक्षाचा बसेल? हे पाहणं औत्सुक्याचं आहे.