मुंबई महापालिकेत एकूण २२७ प्रभाग आहेत. पालिकेच्या निवडणुकीसाठी १५ जानेवारीला मतदान होईल. तर १६ जानेवारीला मतमोजणी होऊन निकाल जाहीर होईल. मुंबई महापालिकेच्या निवडणुकीत ठाकरे बंधूंची प्रतिष्ठा पणाला लागेल. महापालिका हातातून निसटल्यास उद्धव ठाकरे यांचा पक्ष आणखी अडचणीत येईल. त्यामुळे उद्धवसेनेसाठी आता करो या मरोची लढाई आहे.

दुसरीकडे राज ठाकरे यांच्यासाठीही महापालिकेची निवडणूक महत्त्वाची आहे. गेल्या वर्षी झालेल्या विधानसभा निवडणुकीत स्वबळावर लढलेल्या राज ठाकरेंच्या मनसेची पाटी कोरी राहिली. विधानसभेत आता मनसेचा एकही शिलेदार नाही. राज ठाकरे यांच्यासाठी ही मोठी नामुष्कीची बाब आहे. २०१४ आणि २०१९ मध्ये मनसेला प्रत्येकी एका जागेवर यश मिळालं. पण २०२४ मध्ये राज यांचे सुपुत्र अमित ठाकरे यांचाही पराभव झाला. हा पराभव मनसेप्रमुखांच्या जिव्हारी लागला.
अखेर युतीचा मुहूर्त ठरला; उद्धव प्रचंड आग्रही असताना राज ठाकरेंनी विषय कोणासाठी ताणला?
राज ठाकरे यांनी गेल्याच वर्षी झालेल्या लोकसभा निवडणुकीत महायुतीचा प्रचार केला. त्यांना काही जागा अपेक्षित होत्या. पण ते मतदारसंघ सोडण्यास एकनाथ शिंदे यांनी स्पष्ट नकार दिला. त्यामुळे राज यांच्या मनसेनं लोकसभा लढवली नाही. त्यांनी महायुतीला बिनशर्त पाठिंबा दिला. त्या बदल्यात विधानसभेला आपला सन्मान राखला जाईल, अशी त्यांची अपेक्षा होती. ती फोल ठरली. माहीममधून राजपुत्र अमित ठाकरे निवडणूक लढवत होते. इथे महायुती पाठिंबा देईल, असा राज यांचा होरा होता. पण तसं घडलं नाही.

महायुतीत माहीमची जागा शिंदेसेनेला सुटली. तत्कालीन आमदार सदा सरवणकर यांना शिंदेंनी पुन्हा संधी दिली. त्यांनी उमेदवारी मागे घ्यावी, अशी मनसे नेत्यांची इच्छा होती. त्यासाठी प्रयत्नदेखील झाले. पण शिंदे आमदार सरवणकर यांच्या पाठीशी ठाम राहिले. इथे शिंदेसेना विरुद्ध ठाकरेसेना विरुद्ध मनसे असा तिरंगी सामना झाला. त्यात ठाकरेसेनेच्या महेश सावंत यांनी बाजी मारली. सरवणकर यांच्यामुळे अमित ठाकरेंचा पराभव झाला.
भाईंचा ‘देवाभाऊ पॅटर्न’, ठाकरेंनी केलेली चूक टाळली; भाजप पाठोपाठ दुसऱ्या स्थानावर झेप
सदा सरवणकर यांचे चिरंजीव समाधान सरवणकर हे माजी नगरसेवक आहेत. शिंदेसेनेकडून त्यांना पुन्हा संधी दिली जाणार हे जवळपास निश्चित आहे. त्यांची बहीण, सदा सरवणकर यांची कन्या प्रिया सरवणकर गुरव यादेखील राजकारणात सक्रिय असतात. त्यादेखील निवडणुकीच्या रिंगणात उतरु शकतात. त्यामुळे सरवणकर यांच्या कुटुंबातील २ सदस्य निवडणुकीच्या आखाड्यात असतील. या दोन प्रभागांमध्ये त्यांच्यासमोर ठाकरे बंधूंच्या उमेदवारांचं आव्हान असेल.

अमित ठाकरे यांच्या पराभवासाठी जबाबदार ठरलेल्या सरवणकर यांचा पराभव करण्यासाठी ठाकरेंनी फिल्डींग लावली आहे. दादर-माहीममध्ये उद्धव ठाकरेंच्या पक्षाची ताकद आहे. त्यात आता त्यांना राज यांच्या मनसेची जोड मिळेल. सरवणकर भाऊ, बहीण लढतील, त्या दोन जागा ठाकरे बंधू वाटून घेणार असल्याची सुत्रांची माहिती आहे. त्यामुळे माहीममध्ये काय होणार याकडे सगळ्यांचं लक्ष असेल. राज ठाकरे लेकाच्या पराभवाचा बदला घेणार का, हे पाहणं महत्त्वाचं असेल.