‘सत्य परेशान होता है पराजित नही’, असं म्हणत शिंदेंनी यावेळी शिवसेना उबाठावर जोरदार हल्लाबोल केला आहे. ‘किती पोटदुखी आहे. शेतकऱ्याचा मुलगा मुख्यमंत्री झालेला चालत नाही. मी मुख्यमंत्री म्हणून काम नाही केलं तर कार्यकर्ता म्हणून केलं आहे. तुम्ही एकनाथ शिंदे बनून काम केलं पाहिजे, अशी मला अपेक्षा आहे’, असं शिंदे यांनी नवनिर्वाचित नगराध्यक्षांना सांगितलं आहे.

दरम्यान, “सच्चा झुटा, उबाठा को जनताने दिया जमालगोटा’, या शायरीतून शिदेंनी उद्धव ठाकरेंना टोला लगावला आहे. ‘नकली सब घरपे असली मेरे सामने’, असंही यावेळी शिंदे म्हणाले आहेत. ‘पदाधिकाऱ्यांनी जिंकलं पाहिजे या जिद्दिने काम केलं पाहिजे. घरात बसून शिवसेना वाढवता येत नाही. फेसबूक लाइव्ह करुन शिवसेना वाढवता येत नाही. मी महाविकास आघाडी मैदानात पाहिलीच नाही. कमीत कमी फेसबुक लाईव्हवर तरी सभा घ्यायच्या होत्या’, असा जोरदार हल्ला शिंदेंनी मविआवरही चढवला.

‘मी अडीच वर्षे पायाला भिंगरी लावून काम केलं, मला काय मिळालं या पेक्षा जनतेला काय मिळालं हे मी बघतो म्हणून जनता माझ्या सोबत आहे. मी तीन वर्षे आरोपांना उत्तर दिले आहेत. अनेक योजना आणल्या, लोकाभिमूख कल्याणकारी योजना सुरु केल्या. बंद पडलेल्या सर्व गोष्टी सुरु केल्या.’ असंही शिंदे यावेळी म्हणाले.

पुढे बोलताना शिंदे म्हणाले की, ‘जनतेच्या न्यायालयात या म्हणत होते. जनतेच्या न्यायालयातही जनतेनं यांना नाकारलं आहे. विधानसभा, नगरपालिका निवडणुकीच्या निकालाने हे सिद्ध केलं आहे’, असं शिंदे म्हणाले आहेत. दरम्यान, आगामी महापालिका निवडणुकीतही शिवसेनेचा भगवाच फडकणार आहे, असंही शिंदेनी यावेळी सांगितलं.