२०१७नंतर प्रथमच निवडणुका होत असल्याने राजकीय पक्षांमध्ये याबद्दल चांगलीच उत्सुकता आहे. राजकीय पक्षांकडून कोणत्या प्रभागात कोणता उमेदवार राहील, याची चाचपणी सुरू असली तरी अजून कोणत्याही मोठ्या राजकीय पक्षाने उमेदवारी निश्चित केलेली नाही. दरम्यान, अर्ज भरण्याची प्रक्रिया सुरू होणार असल्याने व उमेदवारांच्या मुलाखती संपल्याने आता नावे निश्चित करण्याची प्रक्रिया अंतिम टप्प्यात असल्याचे सांगितले जात आहे. १५ जानेवारीला महापालिकेसाठी मतदान होणार आहे. राज्य निवडणूक आयोगाने जाहीर केलेल्या निवडणूक कार्यक्रमानुसार, येत्या मंगळवार ३० डिसेंबरपर्यंत इच्छुकांना उमेदवारी अर्ज दाखल करता येणार आहेत.

Nagpur Elections: फडणवीस-गडकरींच्या ‘होमटाऊन’मध्ये चौथ्या विजयासाठी भाजप सज्ज; तर पुनरुज्जीवनाच्या आशेने काँग्रेस मैदानात
शहरातील ३८ प्रभाग १० झोनमध्ये विभागण्यात आले आहेत. झोनमध्ये येत असलेल्या संबंधित प्रभागातील इच्छुक उमेदवारांना ऑफलाइन पद्धतीने उमेदवारी अर्ज दाखल करता येईल. उमेदवारांनी दाखल केलेल्या अर्जांची छाननी ३१ डिसेंबरला करण्यात येईल. अर्ज मागे घेण्याची मुदत २ जानेवारी असून, ३ जानेवारीला उमेदवारांची अंतिम यादी प्रसिद्ध होईल तसेच उमेदवारांना निवडणूक चिन्हांचे वाटप होणार आहे. येत्या १५ जानेवारीला मतदान झाल्यानंतर येत्या १६ जानेवारीला मतमोजणी होणार आहे.

असे आहे वेळापत्रक
३ ते ३० डिसेंबर या काळात उमेदवारी अर्ज स्वीकारण्यात येतील.
३१ डिसेंबरला उमेदवारी अर्जांची छाननी.
अर्ज मागे घेण्याची अंतिम मुदत २ जानेवारी.
निवडणूक चिन्ह ३ जानेवारीला वाटप होणार
अंतिम उमेदवारांची यादी ३ जानेवारीला.
१५ जानेवारीला मतदान.
१६ जानेवारीला मतमोजणी.