मोंढाळे ते निंभोरी गावा दरम्यान निंभोरी गावच्या माजी सरपंच मिनाक्षी विनायक दिवटे यांच्या गट क्रमांक २७ नजीक शेताजवळ विरुद्ध दिशेने येणाऱ्या ट्रॅक्टरने बसला कट मारला. यामुळे बस रस्त्याच्या कडेला असलेल्या खड्ड्यात घसरली. सुदैवाने या अपघातात कुठलीही जीवितहानी झाली नसली तरी पुढील अनर्थ टळला. स्टेअरिंग फिरल्याने बस चालकाच्या हाताला इजा झाली आहे. घटनास्थळी ग्रामस्थांनी धाव घेत बसच्या काचा फोडून आत अडकलेल्या प्रवासी व विद्यार्थ्यांची सुटका केली. अर्जुन राठोड, भगवान नलावडे, सागर पाटील, रामराव दिवटे, कोतवाल महेंद्र राऊतराय, सागर मोरे यांच्यासह अनेकांनी प्रवाशांना सुखरूप बाहेर काढले.

अपघात झाल्यानंतर सुमारे अर्धा तास वाहतुकीचा खोळंबा झाला होता. पाचोरा ते सातगाव (डोंगरी) रस्त्याचे काम सुरू असल्याने साईड पट्टीवर माती असल्याने बस घसरली. सर्व प्रवाशांना सुखरुप बाहेर काढून क्रेनच्या साहाय्याने बस काढण्यात आली. अपघात घडला त्यावेळी बसमध्ये ५० प्रवासी व विद्यार्थी होते. घटनेची माहिती मिळताच पाचोरा आगाराचे व्यवस्थापक प्रकाश पाटील यांच्यासह अनेकांनी घटनास्थळी धाव घेत प्रवाशांची विचारपूस केली.