अभिजीत दराडे, पुणे : राज्य निवडणूक आयोगाकडून नुकताच राज्यातील 29 महानगरपालिकांसाठी निवडणूक कार्यक्रम जाहीर करण्यात आला. मुंबई, पुण्यासह निवडणूक कार्यक्रम जाहीर झालेल्या महापालिकांसाठी 15 जानेवारीला मतदान होणार असून 16 जानेवारी रोजी मतमोजणी पार पाडणार आहे. या निवडणुकीसाठी आचारसंहिता लागू झाल्यापासूनच सर्व राजकीय पक्षांनी आपापले उमेदवार फायनल करण्यासाठी मॅरेथॉन बैठकांचे सत्र देखील सुरू केले आहेत. एकीकडे नेते उमेदवार निश्चित करण्यासाठी मुलाखती घेत आहेत तर दुसरीकडे आपली उमेदवारी फायनल व्हावी यासाठी भावी नगरसेवकांनी जोरदार लॉबिंग सुरू केली आहे.

वास्तविक पाहता स्थानिक स्वराज्य संस्थांच्या निवडणुका या कार्यकर्त्यांच्या निवडणुका म्हणून पाहिल्या जातात. मात्र खरंच कार्यकर्त्यांना या निवडणुकीमध्ये संधी दिली जाते का, असा प्रश्न उपस्थित होऊ लागला आहे. हा प्रश्न उपस्थित करण्याचं कारण म्हणजे पुणे महापालिका निवडणुकीच्या उमेदवारांच्या रांगेत सामान्य कार्यकर्त्यांच्या पुढे नेत्यांची लाडकी मुलंच जास्त असल्याचं चित्र पाहायला मिळालं. पुण्यात 41 प्रभागांमध्ये 165 नगरसेवक निवडून जाणार आहेत आणि यामध्ये देखील नेत्यांच्या मुलांनाच जायचं असल्यामुळे कार्यकर्त्यांनी फक्त सतरंजा उचलायचं काम करायचं का? असा संताप्त सवाल सर्वच राजकीय पक्षातील कार्यकर्ते उपस्थित करत आहेत.

पुण्यातील एका मोठ्या राजकीय पक्षातील सामान्य कार्यकर्त्यांनी नाव जाहीर न करण्याच्या अटीवर आपली खदखद ‘महाराष्ट्र टाइम्स ऑनलाइन’शी बोलताना व्यक्त केली आहे. ‘पक्षासाठी आम्ही रात्रंदिवस काम करतो, मात्र उमेदवारी देण्याची वेळ आली की कार्यकर्ता हा सतरंजी उचलताना दिसतो आणि नेत्यांची लाडकी मुलं ही उमेदवारी घेऊन जातात. मग स्थानिक स्वराज्य संस्था निवडणुकींना भाषणांमध्ये तरी कशाला कार्यकर्त्यांची निवडणूक म्हणता?’ असा संतप्त सवाल या कार्यकर्त्यानी विचारला आहे.

आता ज्या वेळेस आपण सर्वपक्षीय इच्छुक उमेदवारांची यादी तपासली त्यावेळेस अनेक धक्कादायक नाव समोर आली आणि यामध्ये नेत्यांच्या घरातील नाव ही जास्त होती. या इच्छुकांच्या यादीत समोर आलेली नावं वाचले तर तुम्हीही म्हणाल की ही कसली आली कार्यकर्त्यांची निवडणूक, ही तर आपल्या आप्तेष्टांचे राजकीय करियर सेट करण्याची निवडणूक.

पुणे महापालिका निवडणुकीतील इच्छुकांची यादी

1) कुणाल टिळक- दिवंगत आमदार मुक्ता टिळक यांचे पुत्र

2) स्वरदा बापट- दिवंगत खासदार गिरीश बापट यांच्या सून

3) राघवेंद्र मानकर- माजी उपमहापौर आणि राष्ट्रवादी काँग्रेसचे माजी शहराध्यक्ष दीपक मानकर यांचा मुलगा

4) रुपेश मोरे- माजी नगरसेवक आणि ठाकरेंच्या शिवसेनेचे नेते वसंत मोरे यांचा मुलगा

5) करण मिसाळ- आमदार आणि राज्यमंत्री माधुरी मिसाळ यांचा मुलगा

6) हर्षवर्धन मानकर- माजी उपमहापौर आणि राष्ट्रवादी काँग्रेसचे माजी शहराध्यक्ष दीपक मानकर यांचा मुलगा

7) सुप्रिया कांबळे- विद्यमान आमदार सुनील कांबळे यांची कन्या

8) प्रणव धंगेकर- शिवसेना महानगरप्रमुख आणि माजी आमदार रविंद्र धंगेकर यांचा मुलगा

9) सुरेंद्र पठारे- वडगाव शेरी विधानसभा मतदारसंघाचे राष्ट्रवादी काँग्रेस (शरदचंद्र पवार) पक्षाचे विद्यमान आमदार बापू पठारे यांचा मुलगा

10) प्रियंका शेंडगे- माजी उपमहापौर सरस्वती शेंडगे यांच्या कन्या

11) हेमंत बागुल- माजी उपमहापौर आणि पुणे महानगरपालिकेत नगरसेवक राहिलेल्या आबा बागुल यांचा मुलगा

12) चेतन टिळेकर- भाजपचे विधान परिषदेचे आमदार योगेश टिळेकर यांचा भाऊ

13) ईशान तुपे- राष्ट्रवादी काँग्रेसचे हडपसर विधानसभा मतदारसंघाचे विद्यमान आमदार चेतन तुपे यांचा मुलगा

14) मयुरेश वांजळे- मनसेचे दिवंगत माजी आमदार रमेश वांजळे यांचे पुत्र

15) महेश पुंडे- भाजप नेत्या आणि माजी नगरसेविका कालींदा पुंडे यांचा मुलगा

16) गिरीराज सावंत- माजी मंत्री आणि आमदार तानाजी सावंत यांचा मुलगा

दरम्यान, घराणेशाहीतील आता जरी ही नाव 16 असली तरी प्रत्यक्षात उमेदवारी जाहीर झाल्यानंतर यामध्ये आणखी काही नावांची भर पडण्याची शक्यता आहे. कार्यकर्त्यांना उमेदवारी मिळवण्यासाठी मोठी कसरत करावी लागत आहे, तर दुसरीकडे आपल्या लाडक्यांना उमेदवारी मिळवण्यासाठी त्यांचे आप्तेष्ट लॉबिंग करत उमेदवारी खेचून आणण्यात यशस्वी ठरत आहेत. त्यामुळे कार्यकर्त्यांच्या निवडणुकीमध्ये कार्यकर्त्यांचाच बळी जातो ही भावना वाढीस लागली आहे, हे मात्र नक्की.