या प्रभागात भाजपमधून जावई आणि सासरे दोघेही इच्छुक असल्याने उमेदवारीसाठी जोरदार रस्सीखेच सुरू झाली आहे. राज तापकीर हे भाजपचे युवा कार्यकर्ते व पदाधिकारी असून, गेल्या काही वर्षांपासून ते प्रभाग क्रमांक २७ मध्ये सक्रियपणे काम करत आहेत. छोट्या-मोठ्या प्रत्येक कामात ते अग्रेसर असल्याचा दावा त्यांनी केला आहे.

दुसरीकडे, त्यांचे सासरे चंद्रकांत नखाते हे तीन वेळा महानगरपालिकेचे नगरसेवक म्हणून निवडून आले असून, क्रीडा समितीचे माजी सभापती देखील राहिले आहेत. त्यामुळे त्यांनी इच्छुक असणे स्वाभाविक मानले जात आहे. मात्र, जावई राज तापकीर यांच्यासाठी सासरे एक पाऊल मागे सरकतील, अशी अपेक्षा राज तापकीर यांनी व्यक्त केली आहे.

Manikrao Kokate: मंत्री कोकाटेंचा पाय खोलात! तातडीच्या सुनावणीस हायकोर्टाचा नकार; अटकेची टांगती तलवार

आगामी महानगरपालिका निवडणुकीत भाजप आपल्यालाच उमेदवारी देईल, असा विश्वास राज तापकीर यांनी व्यक्त केला आहे. मुख्यमंत्री देवेंद्र फडणवीस यांनीही उमेदवारीबाबत मला शब्द दिला असल्याचा दावाही त्यांनी केला आहे. तसेच, या उमेदवारीच्या स्पर्धेमुळे कुटुंबात कोणताही दुरावा किंवा कटुता निर्माण होऊ नये, यासाठी आम्ही प्रयत्न करत असल्याचे त्यांनी स्पष्ट केले आहे.

विशेष म्हणजे, विधानसभा निवडणुकीच्या वेळी राज तापकीर हे इच्छुक असलेल्या सासरे चंद्रकांत नखाते यांच्या पाठीशी खंबीरपणे उभे होते. त्याच पार्श्वभूमीवर आता सासऱ्यांनी माझ्या पाठीशी उभे राहावे, अशी अपेक्षा राज तापकीर यांनी व्यक्त केली आहे.

एकूणच, प्रभाग क्रमांक २७ मधील उमेदवारी तिकीटवरून जावई विरुद्ध सासरे ही लढत सध्या चर्चेचा विषय ठरत असून, भाजप पक्ष नेमकी कुणाला उमेदवारी देणार? याकडे अवघ्या पिंपरी-चिंचवड शहराचे लक्ष लागले आहे.