सावरी गावात असलेल्या रिसॉर्ट आणि त्या रिसॉर्टपासून काही अंतरावर असलेल्या शेडचा फोटो सुषमा अंधारे यांनी दाखवला. ‘सावरी गावात रिसॉर्ट आणि शेड आहे. रिसॉर्ट आणि शेडचा तसा अर्थाअर्थी संबंध येत नाही. रिसॉर्ट आणि शेडमध्ये कोणताही रस्ता नाही. पण फोटोत आपल्याला एक पांढरी रेष दिसते. तिथे १२०० मीटरचा सिमेंट काँक्रिटचा रस्ता आहे. हा रस्ता महामार्गाला जोडलेला आणि शेडला जोडलेला आहे. या रस्त्याची मागणी कोणी केली होती, हा रस्ता कोणासाठी बांधला गेला. कारण या भागात आसपास कुठेही घरं नाहीत,’ असं अंधारे म्हणाल्या.

‘स्थानिकांच्या माहितीनुसार, रिसॉर्टपासून काही अंतरावर असलेल्या शेडमध्ये तीन जण राहायचे. ही शेड गोविंद शिनकरची आहे. त्यानं ती ओंकार डिगेला चालवायला दिली होती. याच शेडवर पोलिसांनी धाड टाकली आणि पोलिसांना अंमली पदार्थांचा साठा सापडला. जवळच असलेल्या रिसॉर्टमधून या शेडमध्ये जेवण जायचं. हे रिसॉर्ट प्रकाश शिंदे यांच्या मालकीचं आहे. त्यांच्या वडिलांचं नाव संभाजी आहे. त्यामुळे प्रकाश शिंदे हे एकनाथ शिंदे यांचे भाऊ असावेत, अशी शंका आली. आम्ही याबद्दल साताऱ्याचे पोलीस अधीक्षक तुषार जोशी यांना विचारलं. तेव्हा त्यांनी प्रकाश शिंदे आणि एकनाथ शिंदे यांचा संबंध नसल्याचं सांगितलं,’ अशी माहिती सुषमा अंधारे यांनी दिली.
Manikrao Kokate: मंत्री कोकाटेंचा पाय खोलात! तातडीच्या सुनावणीस हायकोर्टाचा नकार; अटकेची टांगती तलवार
‘प्रकाश आणि एकनाथ शिंदे यांच्या वडिलांचं नाव संभाजी आहे. त्यामुळे आम्ही काही सातबारा शोधले. तेव्हा आम्हाला एक वडिलोपार्जित सातबारा मिळाला. त्या सातबाऱ्यावर सुभाष संभाजी शिंदे, प्रकाश संभाजी शिंदे अशी नावं आहेत. विशेष म्हणजे एकनाथ शिंदे यांच्या भावांची नावं योगायोगानं तीच आहेत. आणखी एक योगायोग म्हणजे या हॉटेलचं नाव तेजयश असं आहे आणि प्रकाश शिंदेंच्या मुलांची नावं तेजस आणि यश अशी आहेत. हा पण योगायोग असेल,’ असा सविस्तर तपशील अंधारे यांनी दिला.

‘जिथे धाड पडली, त्याच गावात वाढदिवसाचा एक बॅनर आहे. रुद्रांश आणि दादाला आणि मोठ्या पप्पाला वाढदिवसाच्या शुभेच्छा असा मजकूर त्याच्यावर आहे. यातील मोठे पप्पा म्हणजे एकनाथ शिंदे आहेत. शुभेच्छुक म्हणून तेजस आणि यश प्रकाश शिंदे यांची नावं आहेत,’ अशी माहिती अंधारे यांनी वाढदिवसाच्या निमित्तानं लावण्यात आलेल्या पोस्टरचा फोटो दाखवत दिली.
Sharad Pawar NCP: मुंबईत शरद पवारांच्या राष्ट्रवादीत संभ्रम; ठाकरेंसोबत जाणार की काँग्रेसचा हात पकडणार?
प्रकाश शिंदे यांचं नाव पोलिसांनी का दडवलं, असा थेट सवाल सुषमा अंधारे यांनी केला. ‘तो प्रकाश शिंदे उपमुख्यमंत्री एकनाथ शिंदे यांचा भाऊ नाही, मग कोण आहे? एक वेळ मान्य केलं की तो दुसराच कोणीतरी आहे, मग ११५ कोटींचं ड्रग्ज प्रकरण असताना त्याला का सोडून देण्यात आलं? त्या शेडमध्ये काम करणाऱ्या तिघांना पंचतारांकित हॉटेलमधील जेवण कसं पुरवलं जात होतं? त्यांना ते कसं परवडत होतं? शेडमध्ये असं काय चालत होतं? त्याबद्दल प्रकाश शिंदे यांना कधी शंका आली नाही का,’ अशी प्रश्नांची सरबत्ती अंधारे यांनी केली.

सुषमा अंधारे यांनी केलेले आरोप खोटे असल्याचं प्रकाश शिंदे म्हणाले आहेत. जिथे ड्रग्ज सापडलं, तिथपासून रिसॉर्ट लांब आहे. हे अंतर साधारणत: तीन ते साडे तीन किलोमीटर इतकं आहे. ते रिसॉर्ट माझं नाही. ते मी सहा महिन्यांपूर्वी रणजीत शिंदे यांना दिलं. मी ती जागा रणजीत यांना दिली. त्यामुळे त्याचा माझ्याशी काहीही संबंध नाही, असा दावा प्रकाश शिंदे यांनी केला.