महादेव जानकर यांना मोठा धक्का देणारी बातमी समोर येत आहे. रासपचे एकमेव आमदार रत्नाकर गुट्टे यांनी जानकरांसोबत फारकत घेतल्याचं बघायला मिळत आहे.
“आपण महायुतीच्या नेत्यांसोबत बसून बोलून आपल्या मागण्या मंजूर करून घेऊ. सध्या त्यांनी वेगळा निर्णय घेतला आहे आणि मी वेगळा निर्णय घेतला आहे. मला पक्षापेक्षा मतदारसंघातील मतदारांच्या भल्याचे, मतदारसंघाच्या विकासाचे प्राधान्याने पाहावे लागणार आहे, असे म्हणत महाराष्ट्रातील राष्ट्रीय समाज पक्षाचे एकमेव आमदार असलेल्या डॉक्टर रत्नाकर गुट्टे यांनी थेट महादेव जानकर यांच्याशी फारकत घेतली आहे. महायुतीत या अन्यथा तुमचा आणि माझा प्रस्ताव वेगळा असेल”, असा इशारा देखील त्यांनी यावेळी महादेव जानकर यांना दिला आहे.
गंगाखेड विधानसभा मतदारसंघाचे आमदार रत्नाकर गुट्टे हे राष्ट्रीय समाज पक्षाचे महाराष्ट्रातील एकमेव आमदार आहेत. राष्ट्रीय समाज पक्षाचे अध्यक्ष महादेव जानकर यांनी परभणी लोकसभा मतदारसंघातून लोकसभेची निवडणूक महायुतीच्या माध्यमातून लढली होती. यावेळेस राष्ट्रीय समाज पक्षाला महायुतीने पाठिंबा दिला होता. तर राष्ट्रवादी काँग्रेस अजित पवार गटाने आपल्या कोट्यातील जागा देखील राष्ट्रीय समाज पक्षाला सोडत महादेव जानकर यांना पुढे केले होते. पण लोकसभा निवडणुकीत महादेव जानकर यांचा दारुण पराभव झाला. त्यानंतर महादेव जानकर यांनी भाजपसहीत महायुती सोबत फारकत घेतली, त्यांनी विधानसभा निवडणुकीमध्ये 288 जागा लढण्याचा निर्णय घेतला.
गंगाखेड विधानसभा मतदारसंघातून आमदार रत्नाकर गुट्टे यांनी राष्ट्रीय समाज पक्षाच्या माध्यमातून उमेदवारी अर्ज भरला. राज्यभरामध्ये भाजप आणि महायुतीच्या विरोधात राष्ट्रीय समाज पक्षाने विधानसभेला निवडणूक लढवली असतानाही गंगाखेड विधानसभा मतदारसंघात मात्र भाजपने आमदार रत्नाकर गुट्टे यांना थेट पाठिंबा दिला होता. विशेष म्हणजे त्यांच्या विरोधात उमेदवार देखील दिला नव्हता.
रत्नाकर गुट्टे हे राष्ट्रीय समाज पक्षाच्या माध्यमातून आमदार म्हणून निवडून आले असले तरी त्यांना महायुतीने पुरस्कृत केले होते. आता महादेव जानकर हे काँग्रेससह महाविकास आघाडीच्या घटक पक्षांसोबत गेले असल्याने आमदार रत्नाकर गुट्टे हे महादेव जानकर यांच्यापासून दूर जात आहेत. स्थानिक स्वराज्य संस्थांच्या निवडणुकांमध्ये आमदार रत्नाकर गुट्टे यांनी राष्ट्रीय समाज पक्षाच्या एबी फॉर्मवर आपल्या पदाधिकाऱ्यांना निवडणूक लढवू दिली नाही.
विशेष म्हणजे यशवंत सेना आणि मित्रमंडळाच्य माध्यमातून गंगाखेड आणि पूर्णा नगरपालिकेची निवडणूक लढवली. आता परभणी महापालिकेसाठी देखील आमदार रत्नाकर गुट्टे यांनी राष्ट्रीय समाज पक्षाला बाजूला सारत यशवंत सेना आणि परभणी परिवर्तन पॅनलच्या माध्यमातून परभणी शहर महानगरपालिकेची निवडणूक लढण्याचा निर्णय घेतला आहे.
‘परभणी महापालिकेवर आमचाच महापौर बसेल’
आमदार रत्नाकर गुट्टे यांनी यशवंत सेना आणि परिवर्तन विकास पॅनलच्या माध्यमातून परभणी शहर महानगरपालिकेची निवडणूक लढण्याची घोषणा केली आहे. महायुती आणि महाविकास आघाडीच्या कोणत्याही पक्षासोबत युती करणार नसल्याचा त्यांनी निर्धार केला आहे. परभणी शहर महानगरपालिकेमध्ये सेटलमेंटचे राजकारण चालते आणि त्यामुळेच परभणी शहराची बकाल अवस्था झाली असल्याचेही ते म्हणाले. या महापालिकेच्या निवडणुकीमध्ये आम्हाला भरभरून यश मिळेल आणि यशवंत सेना आणि परिवर्तन विकास पॅनलचाच महापौर बसेल, असा विश्वास आमदार रत्नाकर गुट्टे यांनी व्यक्त केला आहे.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा