नवापूर तालुक्यातील खांडबारा गावात जितू परदेशी यांच्या मालकीचे खत व बियाणे विक्रीची दुकान असून दुकानाच्या गल्ल्यातून दररोज पैसे चोरीला जात होते. चोराचा शोध घ्यावा म्हणून त्यांनी सीसीटीव्ही तपासले असता उघड झाले असून चोर कुणी अनोळखी नसून व्यापाऱ्याचाच जिवलग मित्रच होता. या प्रकरणी गुन्हा दाखल करण्यात आला असून पोलिसांनी संशयिताला अटक केली आहे.

Kolhapur Accident: संसार फुलण्याआधीच सगळं संपलं; भीषण अपघातात सोनालीने जीव सोडला, नंतर नातेवाईकांनी नवऱ्यालाच…, कोल्हापुरात खळबळ

कॅमेरामुळे प्रकार समोर

जितू परदेशी यांनी आपल्या दुकानात दोन्ही बाजूंना सीसीटीव्ही कॅमेरे बसवलेले होते. गेल्या काही दिवसांपासून गल्ल्यातील रकमेतील फरक जाणवत असल्याने व्यापाऱ्याच्या मनात संशय निर्माण झाला. त्यांनी फुटेज तपासले असता त्यांना अक्षरशः धक्का बसला. दुकानात नेहमी येणारा त्यांचाच मित्र अनिल शर्मा गल्ल्याजवळील खुर्चीवर बसून व्यापाऱ्याची नजर चुकवून हळूच गल्ल्यात हात घालतो आणि नोटा खिशात टाकतो, हे वारंवार दिसून आले. फुटेजनुसार ही चोरी एक दिवसाची किंवा योगायोगाने झालेली नव्हे; तर दररोजची ‘नियमित’ कृती असल्याचे स्पष्ट झाले आहे.

फुटेजमध्ये दिसून येते की अनिल शर्मा ठराविक वेळेला दुकानात येतो, गल्ल्याजवळ आरामात बसतो, व्यापारी इतर कामात गुंग झाला की गल्ल्याकडे हात वळवतो, आणि सहजपणे गल्ल्यातील नोटा स्वतःच्या खिशात टाकतो. अतिविश्वास आणि जवळच्या नात्याचा गैरफायदा घेत केलेल्या या कृतीने व्यापाऱ्याला मानसिक धक्का बसला आहे.

सध्या हा चोरीचा विडिओ सोशल मीडियावर चांगलाच व्हायरल होत आहे. या प्रकरणात जितू सुरेश परदेशी (रा. खांडबारा) यांच्या फिर्यादीवरून अनिल रंजनलाल शर्मा (रा. खांडबारा) यांच्याविरुद्ध विसरवाडी पोलीस ठाण्यात गुन्हा दाखल करण्यात आला आहे. संशयित आरोपीला पोलिसांनी ताब्यात घेतले असून पुढील तपास सुरू आहे.