कोल्हापुरातील छत्रपती प्रमिलाराजे नागरी रुग्णालय अर्थात सीपीआर रुग्णालयात सोमवारी (8 डिसेंबर) पहाटे प्रसुतीनंतर अवघ्या दोन तासांतच रक्तदाब आणि ऑक्सिजनची पातळी खालावल्याने उत्तर प्रदेश मूळच्या अंतिमा आनंदा गुप्ता (वय 34, रा. राजारामपुरी पाचवी गल्ली) यांचा मृत्यू झाला आहे. नैसर्गिक प्रसुतीनंतर जन्मलेल्या निरोगी मुलीला आईच्या मायेचा आधार कायमचा गमावावा लागला आहे. तर या घटनेने कुटुंबावर शोककळा पसरली असून, नातेवाईकांमध्ये रुग्णालयाच्या वेळेवर उपचाराबाबत संभ्रम पाहायला मिळाला आहे.

प्रसवकाळापासून मृत्यूपर्यंतची घटना

अंतिमा गुप्ता यांना नऊ महिन्यांच्या गर्भावस्थेत रविवारी (7 डिसेंबर) रात्री प्रसवकळा सुरु झाल्या. नातेवाईकांनी त्यांना तात्काळ खाजगी रुग्णालयात दाखल केले. मध्यरात्री दीडच्या सुमारास तिथे नैसर्गिक प्रसुती होऊन त्यांनी निरोगी मुलगी जन्मली. मात्र, प्रसुतीनंतर काही क्षणांतच त्यांचा रक्तदाब अचानक खाली आला आणि शरीरातील ऑक्सिजनचे प्रमाण घसरले, यामुळे त्या बेशुद्ध झाल्या. खाजगी रुग्णालयातील डॉक्टरांनी तात्काळ सीपीआर रुग्णालयात हलवण्याचा सल्ला दिला.
Crime News: मुलाला संपवलं, मग आई-आजीने जीव दिला; एकाच घरात तीन बॉडी पाहून शेजारी हादरले
सकाळी चारच्या सुमारास नातेवाईकांनी अंतिमा यांना सीपीआरमध्ये दाखल केले. मात्र, उपचार सुरू करण्यापूर्वीच त्यांचा मृत्यू झाल्याचं डॉक्टरांनी सांगितलं. सीपीआरमधून मिळालेल्या प्राथमिक माहितीनुसार, प्रसुतीनंतरील रक्तदाबातील घसरण आणि ऑक्सिजनच्या कमतरतेमुळे हा मृत्यू झाल्याचं सांगितलं जात आहे. नातेवाईकांनी त्वरित शवविच्छेदनाची मागणी केली असून, अहवालानंतरच नेमके कारण स्पष्ट होणार आहे.

मृत्यूनंतर कुटुंबातील आक्रोश

या घटनेमुळे गुप्ता कुटुंब हेलावून गेले आहे. उत्तर प्रदेशहून कोल्हापूरला स्थायिक झालेल्या अंतिमा यांचे पती आनंदा आणि इतर नातेवाईकांनी रुग्णालय प्रशासनावर उपचारातील उशीर आणि अपुरी काळजी घेतली असल्याचा आरोप केला आहे. तर नवजात मुलीच्या भविष्याबाबत त्यांनी अतिव दु:ख व्यक्त केलं आहे. सीपीआर पोलिस चौकीत या प्रकरणाची औपचारिक नोंद झाली असून, तपास सुरू आहे.
Pandharpur News: पाच वर्षीय प्रज्वल आई-पप्पासोबत शेतात गेला अन् मग अख्ख्या कुटुंबाचा अंत, पंढरपुरात हळहळ

प्रसुतीनंतरच्या मृत्यूंमध्ये वाढ

कोल्हापूर शहरात गेल्या काही आठवड्यांत सीपीआर आणि इतर रुग्णालयांमध्ये प्रसुतीनंतर महिलांच्या मृत्यूच्या घटना वाढत चालल्या आहेत. पंधरा दिवसांपूर्वी पंचगंगा हॉस्पिटलमध्ये प्रसुतीनंतर महिलेचा मृत्यू झाला होता. तर चार दिवसांपूर्वीही अशीच घटना घडली होती. या घटना ताज्या असतानाच अंतिमा गुप्ता यांचाही मृत्यू झाला आहे.

मातृ मृत्यूदर कमी करण्यासाठी राज्य सरकारने ‘सुरक्षित प्रसुती’ योजना राबवली असली, तरी ग्रामीण आणि शहरी भागात खाजगी रुग्णालयांमधील उपचारांनंतर सीपीआरकडे हलवले जाणारे रुग्ण वाढत आहेत, ही एक चिंतेची बाब आहे.