राजारामपुरी परिसरात लहान मुलांच्या किरकोळ भांडणाचा राग वाढून मोठ्यांमध्ये वाद सुरू झाला. या वादातूनच चाकू हल्ला होऊन ३२ वर्षीय नागरिक गंभीर जखमी झाला. ही घटना रविवारी सायंकाळी घडली. याप्रकरणी माजी नगरसेवक प्रदीप पोवार यांचे चिरंजीव धनराज प्रदीप पोवार (वय ४९, रा. १३ वी गल्ली, राजारामपुरी) याला राजारामपुरी पोलिसांनी अटक केली आहे. सोमवारी न्यायालयाने त्याला एक दिवसाची पोलिस कोठडी सुनावली. जखमी यासीन जहांगीर मोमीन (वय ३२, रा. १२ वी गल्ली, राजारामपुरी) यांच्यावर खासगी रुग्णालयात उपचार सुरू आहेत. त्यांच्या गालावर खोल जखम झाल्याचे समजते.

Beed News: ‘…तर महाराष्ट्र बंद’, संतोष देशमुख हत्या प्रकरणासंबंधी घडामोडीवर मनोज जरांगेंचा सरकारला थेट इशारा, नेमकं काय घडतंय?

मुलांच्या शालेय वादातून सुरू झाला प्रकार

संशयित पोवार आणि जखमी मोमीन यांची मुले एकाच शाळेत सातवीत शिकतात. रविवारी दुपारी शाळा सुटल्यानंतर परिसरातील मैदानावर खेळताना मुलांची हलकी झटापट झाली. या वादात धनराज पोवार यांच्या मुलाला डोळ्याजवळ इजा होऊन रुग्णालयात टाके घालावे लागले. त्यावेळी प्रकरण तात्पुरते मिटले असले, तरी पोवार यांनी हा राग मनात ठेवल्याचे सांगितले जाते.

काही वेळानंतर यासीन मोमीन यांच्याशी वाद सुरू झाला आणि संताप अनावर झाल्याने पोवार यांनी घरून धारदार चाकू आणून मोमीन यांच्या चेहऱ्यावर हल्ला केला.

घटनास्थळी तणाव

हल्ल्यानंतर काही काळ परिसरात तणावाचे वातावरण निर्माण झाले. माहिती मिळताच राजारामपुरी पोलिसांनी घटनास्थळी धाव घेत परिस्थिती नियंत्रणात आणली. रुग्णालयातून फिर्याद नोंदवण्यात आली आणि रात्री उशिरा गुन्हा दाखल झाला. पोलिसांनी सीसीटीव्ही फुटेज, साक्षीदारांचे जबाब आणि पुरावे गोळा केले. सोमवारी सकाळी संशयिताला न्यायालयात हजर केल्यावर सरकार पक्षाने गुन्ह्याचे गंभीर स्वरूप मांडत पोलिस कोठडीची मागणी केली.

या घटनेने स्थानिक नागरिकांमध्ये भीती आणि संताप व्यक्त केला जात आहे. मुलांच्या छोट्या भांडणात पालकांनी अतिरेकी भूमिका न घेण्याचा सल्ला ज्येष्ठ नागरिकांनी दिला आहे. तसेच राजारामपुरी पोलिसांनी अशा घटनांवर कठोर कारवाई करण्याचे आश्वासन दिले असून तपास सुरू आहे.