मुरुड येथील एका तरुणाने इंस्टाग्रामवरून अल्पवयीन मुलीसोबत परिचय सुरू केला. सुरुवातीला साध्या गप्पांच्या माध्यमातून संवाद वाढत गेला; मात्र आरोपीने हळूहळू मुलीला मानसिकदृष्ट्या दडपणात ठेवण्याचे प्रयत्न सुरू केले. मुलगी भेटण्यास तयार नसल्याने आरोपीने तिच्या आईला ठार मारण्याची धमकी दिली. भीतीच्या छायेत मुलगी दबावाखाली जाण्यास भाग पडली.

वारंवार नकार दिल्यानंतरही आरोपीने मुलीवर दबाव वाढवत तिला धमकावले. “नाही आलीस तर तुलाही मारून टाकीन” अशा धमक्या दिल्यानंतर आरोपीने तिला जंगल परिसरात नेऊन लैंगिक अत्याचार केला. घटनेनंतर मुलगी सायंकाळी घरी परतली. तिच्या चेहऱ्यावरचे दुःख, भीती आणि अस्वस्थता पाहून आईने चौकशी केली तेव्हा सर्व सत्य बाहेर आले आणि कुटुंबावर दुःखाचा डोंगर कोसळला.

मुलीच्या पालकांनी तातडीने म्हसळा पोलीस ठाण्यात धाव घेत औपचारिक तक्रार नोंदवली. तक्रार मिळताच म्हसळा पोलिसांनी विशेष पथक तयार करून आरोपीविरुद्ध तपास सुरू केला आणि अवघ्या दोन तासांत आरोपीला अटक करण्यात पोलिसांना यश आले. या जलद कारवाईचे सर्वत्र कौतुक होत आहे.

या संपूर्ण कारवाईचे मार्गदर्शन जिल्हा पोलीस अधीक्षक आंचल दलाल, उपविभागीय पोलीस अधिकारी सविता गर्जे आणि म्हसळा पोलीस ठाण्याचे निरीक्षक रवींद्र पारखे यांनी केले. आरोपीवर POCSO कायद्यासह अन्य गंभीर कलमान्वये गुन्हा दाखल करण्यात आला आहे.

घटनेनंतर परिसरात संतापाची लाट उसळली असून, सोशल मीडियाद्वारे वाढलेल्या असुरक्षित संपर्कांविषयी लोक गंभीर चिंता व्यक्त करत आहेत. मुलांच्या सुरक्षेबाबत पालकांनी जागरूक राहण्याची गरज अधोरेखित होत आहे. पीडित मुलीला न्याय मिळवून देण्यासाठी नागरिकांनी पोलिसांच्या तत्पर कारवाईवर विश्वास व्यक्त केला आहे.