यासोबतच पश्चिम रेल्वेवरील दुसरा महत्त्वाचा प्रकल्प म्हणजे भिवंडीजवळील खरबावपर्यंत समर्पित मालवाहतूक कॉरिडॉर (DFC) पूर्ण करणे. हा कॉरिडॉर तयार झाल्यानंतर सर्व मालगाड्या प्रवासी मार्गांवरून हटवण्यात येतील, ज्यामुळे लोकल व बाहेरील गाड्यांची वाहतूक अधिक सुरळीत होणार आहे.

मुंबई- पुणे प्रवास करणाऱ्यांसाठी मोठी बातमी! सिंहगड, प्रगती, डेक्कन क्वीनसह ‘या’ एक्स्प्रेस आज रद्द, जाणून घ्या अपडेट

प्रोजेक्ट विरार

‘प्रोजेक्ट विरार’अंतर्गत विरार स्थानकावर वेगाने काम सुरू आहे. स्थानकात मोठे बदल करण्यात येत असून, नव्या फलाटांच्या बांधकामालाही सुरूवात झाली आहे. विरार–डहाणू दरम्यान तिसरी आणि चौथी मार्गिका उभारण्याचे काम सुरू असून, त्यामुळे लोकल गाड्यांची संख्या वाढू शकेल. हा प्रकल्प 2027 पर्यंत पूर्ण होण्याचे लक्ष्य असून, प्रवाशांची गर्दी विशेषतः विरार–डहाणू पट्ट्यात मोठ्या प्रमाणात कमी होण्याची अपेक्षा आहे.

काही आठवड्यांपूर्वीच मालवाहतूक कॉरिडॉरचे काम विरारहून भिवंडीपर्यंत पोहोचले आहे. त्यामुळे या मार्गावरून जाणाऱ्या मालगाड्या प्रवासी मार्गांचा वापर न करता थेट या नव्या रूटने धावणार आहेत. यामुळे विरार परिसरात लोकल गाड्यांमध्ये होणारा खोळंबा टळणार आहे.

विरार स्टेशनवरील मोठे बदल

विरार–डहाणू रोड सेक्शनमध्ये तिसऱ्या आणि चौथ्या मार्गिकेसाठी आवश्यक असलेल्या महत्त्वाच्या कामांनाही वेग आला आहे. या अनुषंगाने प्लॅटफॉर्म क्रमांक 3A चे रुंदीकरण केले जात आहे, तसेच विरार स्थानकावर नवीन होम प्लॅटफॉर्म 5A चे बांधकाम सुरू आहे. प्लॅटफॉर्म 1 च्या दक्षिणेकडे दोन नवे प्लॅटफॉर्म तयार होत आहेत.
वाढलेल्या लोकल फेऱ्या या नव्या मार्गिकांवरूनच चालवल्या जातील.

मुंबई शहरी वाहतूक प्रकल्पांतर्गत 3,578 कोटी रुपयांच्या खर्चाने होत असलेला विरार–डहाणू चौपदरीकरण प्रकल्प वेगाने पुढे जात आहे. प्रकल्पासाठी आवश्यक जमिनीचे अधिग्रहण पूर्ण झाले असून, विरार, वैतरणा, सफाळे, केळवे रोड, डहाणू रोड आणि उमरोली स्थानकांवर नव्या स्टेशन इमारतींचे काम सुरू आहे. याचबरोबर पुलांचे कामही समांतर पद्धतीने सुरू आहे.