मिळालेल्या माहितीनुसार, हैदरअली सिरवार यांच्या घरी ही दुर्दैवी घटना घडली आहे. 24 ऑक्टोबर 2025 रोजी रत्नागिरी सिव्हिल हॉस्पिटलमध्ये अफिफाचा जन्म झाला होता. 5 डिसेंबर 2025 रोजी पहाटे 5.30 वाजता आईने अफिफाला दूध पाजून परत झोपवले. मात्र, सकाळी साडेसात वाजता उठल्यावर मुलीची कोणतीही हालचाल होत नव्हती आणि ती बेशुद्ध अवस्थेत होती.

मुलीची अवस्था पाहून तातडीने तिला उपचारासाठी चौधरी हॉस्पिटल रत्नागिरी येथे नेण्यात आलं. तेथील डॉक्टरांनी तिला पाहून लगेच रत्नागिरी सिव्हिल हॉस्पिटलमध्ये हलवण्याचा सल्ला दिला. वडिलांनी तिला सिव्हिल हॉस्पिटलमध्ये दाखल केलं, जिथे डॉक्टरांनी तिला मृत घोषित केलं.

वैद्यकीय अहवालानुसार, अफिफाच्या मृत्यूचं कारण ‘सेरेब्रोपल्मोनरी एडेमा’ असल्याचं सांगण्यात आलं आहे. हा एक असा आजार आहे ज्यात फुफ्फुसांमध्ये पाणी साठते. लहान मुलांमध्ये, विशेषतः नवजात अर्भकांमध्ये, अशा प्रकारची अचानक होणारी गुंतागुंत जीवघेणी ठरू शकते. या घटनेमुळे सिरवार कुटुंबावर दुःखाचा डोंगर कोसळला आहे. रत्नागिरी शहरातील क्रांतीनगर झोपडपट्टी परिसरात घडलेल्या या हृदय पिळवटून टाकणाऱ्या घटनेनं सर्वांनाच धक्का बसला आहे.